Ámbos luna a registrá oumento:

WILLEMSTAD – 4 di aprel 2013:-E promé tres lunanan di aña ta tras di lomba i Ofisina di Turismo di Kòrsou (CTB) ta anunsiá un kresementu den sifranan di turismo pa luna di Yanüari i Febrüari 2013. Tur huntu 72,687 turismo di estadia (Stay Over Arrivals)  a bishitá nos isla den e promé 2 lunanan di aña, esaki ta 5% mas tantu ku aña pasá den e mesun lunanan. Sifranan preliminario pa luna di Yanüari 2013 ta 4% mas haltu ku e mesun luna na aña 2012. Aña pasá a registrá 34,408 turista miéntras ku e aña aki por a konta ku 35,901turista ku a bishitá nos isla. Turismo di estadia for di Nort Amérika a baha ku 2% den luna di Yanüari ku ta ekivalente na 146 turista ménos for di e region aki. Sifranan di bishitante for di Merka (US) a registrá un oumento di 3%, Canada na su turno a registrá un kaida di 16% (1,519 turista total) pa e luna di yanüari 2013. Merkado di Suramérika a oumentá ku 29% den luna di yanüari 2013, ku un total di 9,987 turismo di estadia kompará ku 7,724 den 2012. For di Venezuela un total di 6,291 bishitante a keda registrá den e promé luna di aña, esaki ta un oumento di 29%. Brazil, Colombia, Sürnam i Panamá tambe a registrá un oumento den turismo di estadia, esakinan ta 15%, 13%, 51% i 94% respektivamente. Den sifranan apsoluto e paisnan sekundario den Suramérika a registrá 1,034 / 955/ 706 i 140 turista di estadia. Merkado di Oropa a registrá un kaida di 7% den yanüari 2013, e merkado aki a trese un total di 15,535 turista pa Kòrsou den e promé luna di 2013. Na 2012 esaki tabata 16,760. E pais ku usualmente ta pèrkurá pa un mayor kantidat di turista, Ulanda- e luna di yanüari ta konosé un kaida di 14%. Kòrsou ta habri aña ku 11,940 turista for di Ulanda. Alemania a krese signifikantemente registrando 12%, ekivalente na 1,297 bishitante for di Alemania; esaki ta efektonan direkto di promoshon i kampañanan ku Ofisina di Turismo i su partnernan a realisá den final di 2012 den e merkado aki. Sifranan for di e region Karibense a kai ku 6% den yanüari 2013, un total di 2,735 bishitante a drenta portanan di Kòrsou. E bishitantenan for di Aruba sí a oumentá ku 6% den e promé luna di 2013; motibu pa esaki ta e temporada di Karnaval ku tabata konsiderablemente mas trempan e aña aki, hopi ta e bishitantenan for di Aruba ku a bin nos isla pa akudí na e Festival di Tumba, ku e aña aki tabata den luna di Yanüari. Pa loke ta e sifranan ku ta keda presentá pa luna di Febrüari 2013, por mira un kresementu di 5% den turismo di estadia- por hasi menshon ku ta registrá alrededor di 1500 turista mas tantu kompará ku febrüari di aña pasá. Den Febrüari 2013 un total di 36,786 turista di estadia a bishitá Kòrsou. Merkado Nort Amérika ta konosé un oumento chikitu di 1%, merkado merikano (US) tambe a registrá un oumento di 5% ekivalente na 5,742 turista, pero turismo prosedente di Canada sí a kai ku 11% den luna di febrüari di e aña aki. Merkado di Suramérika a oumentá ku 26% den luna di Febrüari 2013, ku un total di 9,815 turismo di estadia kompará ku 7,815 den 2012. For di Venezuela un total di 6,723 bishitante a keda registrá den e di dos luna di aña, esaki ta un oumento di 41%. Sürnam, Colombia i Panamá tambe a registrá un oumento den turismo di estadia, esakinan ta 34%, 12% i 106% respektivamente. Den sifranan apsoluto e paisnan sekundario den Suramérika a registrá 787 / 522 i 140 turista di estadia. Brazil a konosé un kaida di 14% pa luna di febrüari 2013. Merkado di Oropa a registrá un kaida di 7% den febrüari 2013, e merkado aki a trese un total di 15,870 turista pa Kòrsou den e di dos luna di 2013. Na 2012 esaki tabata 17,081. Ulanda den e luna di febrüari ta konosé un kaida di 12% ekivalente na 12,307 turista. Alemania a sigui krese ku 6%, esaki ta ekivalente na 1,315 bishitante for di e region aki. Sifranan di den Karibe a kai ku 5% den febrüari 2013, un total di 2,460 bishitante a drenta Kòrsou. E bishitantenan for di Aruba a disminuí registrando un kaida di 19% den e di dos luna di 2013, miéntras bishitantenan di Aruba a bira ménos, esnan di Repúblika Dominikana a oumentá ku 15% i bishitantenan for di Trinidad & Tobago tambe a krese den forma signifikante registrando kresementu di 45%. E oumento den bishitante prosedente di Trinidad & Tobago ta resultado direkto di un charter flight ku tabata tin den luna di febrüari. E buelo aki a keda skematisá spesialmente pa e festividatnan di karnaval, tur huntu e buelo a trese 125 turista èkstra Kòrsou.

 Turismo Krusero

Sifranan di turismo krusero ta registrá un kresementu di 33% den yanüari 2013. E kantidat di ‘ship calls’ a subi, por menshoná ku un total di 48 barku krusero a bishitá nos isla den e promé luna di 2013. Tur huntu nan a trese 99,459 turista pa Kòrsou. Pa klousurá e resúmen por hasi menshon ku e sifranan di turismo krusero ta registrá un kaida di 3% den febrüari 2013. E kantidat di ‘ship calls’  tabata menos, un total di 36 barku krusero a bishitá nos isla den febrüari di 2013, aña pasá esaki tabata 37 den e mesun luna respektivamente.