149,000 turista a bishitá Kòrsou den e promé 4 lunanan di aña:
WILLEMSTAD- 2 Yüni 2013:- Ya kaba nos ta drentando e di dos mitar di aña i Curaçao Tourist Board (CTB) ta anunsiá kresementu den sifranan di turismo pa luna di Mart i Aprel 2013. “Mester rekonosé tur ku ta aportá na mantené e bon resultadonan numériko. Ku nos ta mira kresementu den sifra mester ta indikashon ku nos ta riba e bon kaminda pa desaroyo duradero i pa posishonamentu sólido di nos pais komo destinashon den Karibe. Den luna di Aprel por hasi menshon di e partnership ku Timmerdorf Strand na Alemania, tambe nos por para ketu na e rekonosementu di About.com na unda ku un biaha mas Kòrsou ta keda galardoná komo destinashon faborito den Karibe. Pues e resultadonan no ta únikamente numériko, pero tambe ta haya bida den echo”, esaki di akuerdo ku direktor di CTB, Sr. Ghatim Kabbara. Sifranan preliminario pa luna di Mart 2013 ta 11% mas haltu ku e mesun luna na aña 2012. Aña pasá a registrá 35,752 turista miéntras ku e aña aki por a konta ku 39,753 turista ku a bishitá nos isla. Pa luna di Aprel 2013 tin un kresementu di 5% kompará ku e mesun luna aña pasá. Tur huntu den e promé kuater lunanan di 2013, Kòrsou a risibí 149,010 turista di estadia, esaki ta un 6% di oumento total- kompará ku aña pasá den e mesun lunanan.
Mart 2013:
Turismo di estadia (Stay-Over Arrivals) for di Nort Amérika a oumentá ku 6% den luna di Mart ku ta ekivalente na 8,059 for di e region aki. Sifranan di bishitante for di Merka (US) a registrá un oumento di 4% (6,160 turista total), Canada na su turno a registrá un kresementu di 11% (1,899 turista total) pa e luna di Mart 2013. Merkado di Suramérika a oumentá ku 28% den luna di Mart 2013, ku un total di 10,623 turismo di estadia kompará ku 8,322 den 2012. For di Venezuela un total di 7,413 bishitante a keda registrá, esaki ta un oumento di 32%. Sürnam i Brazil tambe a registrá un oumento den turismo di estadia, esakinan ta 101% i 8% respektivamente. Den sifranan apsoluto e paisnan sekundario den Suramérika a registrá 1,219 i 580 den turista di estadia.
Merkado di Oropa a registrá un kaida leve di 1% den Mart 2013; e merkado aki a trese un total di 15,925 turista pa Kòrsou, esaki tabata 16,094 durante e mesun luna na 2012. E pais ku usualmente ta pèrkurá pa un mayor kantidat di turista, Ulanda- e luna di Mart ta konosé un kaida di 9%. Pa luna di Mart nos ta risibí 10,935 turista for di Ulanda. Alemania a krese registrando 9%, ekivalente na 2,243 bishitante, aña pasá esaki tabata 2,054. Den transkurso di e promé lunanan di aña, a kondusí kampañanan i promoshonnan ku tabata di gran impakto na Alemania, e kresementu posiblemente ta efektonan direkto di e esfuersonan realisá den e merkado di Alemania.
Por hasi menshon di un kampaña via di e plataforma di Facebook ku a resultá masha eksitoso dirigiendo atenshon total riba Kòrsou komo destinashon preferí den Karibe.‘Stay Over’ di den Karibe a oumentá ku 8% den luna di Mart. E bishitantenan for di Aruba a oumentá ku 1%, den sifra apsoluto esaki ta ekivalente na 1,516 turista di estadia. Den 2012 esaki tabata 1,502.
Aprel 2013:
Pa loke ta e sifranan ku ta keda presentá pa luna di Aprel 2013, por mira un kresementu di 5% den turismo di estadia (Stay-Over Arrivals). Den Aprel 2013 un total di 36,514 turista di estadia a bishitá Kòrsou. Merkado Nort Amérika ta konosé un oumento signifikativo di 10%, merkado merikano (US) tambe a registrá un oumento di 4% ekivalente na 5,358 turista i Canada ta sobresalí ku un oumento di 61% den luna di Aprel di e aña aki. Merkado di Suramérika a krese ku 1% den luna di Aprel 2013, ku un total di 10,105 turismo di estadia kompará ku 10,028 den 2012. For di Venezuela un total di 6,909 bishitante a keda registrá den Aprel, lokual ku ta meskos ku aña pasá mesun periodo. Sürnam, Panamá i Brazil tambe a registrá un oumento den turismo di estadia, esakinan ta 18%, 75% i 1% respektivamente. Den sifranan apsoluto e paisnan sekundario den Suramérika a registrá 1,299, 105 i 623 turista di estadia. Colombia a konosé un kaida di 28% den turismo di estadia pa luna di Aprel 2013.
Merkado di Oropa a registrá un kresementu leve di 1% den Aprel 2013, e merkado aki a trese un total di 15,141 turista pa Kòrsou den luna di Aprel. Ulanda den e luna di Aprel ta konosé un kresementu di 2% ekivalente na 11,797 turista. Alemania a kai leve registrando 9% ménos, esaki ta ekivalente na 1,300 bishitante for di e region aki. Sifranan di den Karibe a kai ku 10% den Aprel 2013, un total di 3,349 bishitante a drenta Kòrsou. E bishitantenan for di Aruba a disminuí registrando un kaida di 18% den luna di Aprel 2013, miéntras bishitantenan di Aruba a bira ménos esnan di Repúblika Dominikana a oumentá ku 25%.
Turismo Krusero
Sifranan di turismo krusero ta registrá un kaida leve di 2% den Mart 2013. E kantidat di ‘ship calls’ a subi ku 6%, por menshoná ku un total di 35 barku krusero a bishitá nos isla. Tur huntu nan a trese 69,251 turista pa Kòrsou. Aña pasá den e mesun luna tabata tin 33 barku i 70,461 turista krusero ku a bishitá Kòrsou.
Pa klousurá por hasi menshon ku e sifranan di turismo krusero ta registrá un oumento di 20% den Aprel 2013. E kantidat di ‘ship calls’ a subi den e luna aki kompará ku aña pasá, por menshoná ku un total di 28 barku krusero a bishitá nos isla den Aprel, aña pasá esaki tabata 25 den e mesun luna respektivamente. Pa luna di Aprel un total di 55,055 turista a drenta via di nos portanan.