den yanüari 2014…..

WILLEMSTAD- 20 di mart 2014 – Hasiendo uso di e modelo ‘Turistika’, e departamentu di investigashon di Ofisina di Turismo di Kòrsou (CTB) huntu ku MEO a kalkulá ku durante yanüari 2014 sektor di turismo a generá un impakto direkto di 64.1 mion florin pa nos ekonomia lokal. Na yanüari 2013 e entrada generá tabata 60.1 mion florin. Durante e promé luna di aña nos merkado prinsipal, Hulanda a sigui krese. E merkado Europeo a krese supstansialmente na yanüari 2014. E total generá for di e region aki ta 32.8 mion florin ku ta igual na 51% di e total di entrada generá for di turismo durante e promé luna di aña. Turistanan for di e region di Sur Amérika a gasta un total di 14.7 mion florin i Nort Amérika 12.0 mion florin. E entrada generá for di Karibe a keda kalkulá na 2.9 mion florin pa loke ta trata yanüari 2014. Sifranan preliminar kolekta pa CTB ta indiká ku turismo di estadia pa loke ta trata luna di yanüari 2014 a krese ku 4% kompará ku yanüari aña pasa. Un total di 37.415 turista di estadia a bishita nos isla na luna di yanüari 2014. Na yanüari aña pasa e kantidat di turista di estadia a ser kalkulá na 36.083. Merkado Europeo a konosé un kresementu di 13% durante di yanüari 2014. Un total di 17.699 turista di estadia a keda registrá kompará ku 15.598 na luna di yanüari 2013. Hulanda, e pais for di kua nos ta risibí mas tantu turista, na yanüari 2014 a krese ku 13% ku ta un total di 13.515 turista di estadia kompará ku 11.986 na 2013. Esaki ta resultado di e esfuersonan di merkadeo ku a keda hasi den estrecho koperashon ku Corendon, TUI i Kuoni /Does & Cadushi. For di Alemania un total di 1.335 turista a bishita nos isla, esaki ta un kresementu di 3% kompará ku yanüari aña pasa kaminda a registrá un kantidat di 1.299 turista di estadia. E merkado di Sur Amérika a konosé un bahada di 6% na yanüari 2014, ku un total di 9.485 turista di estadia kompará ku 10.054 na 2013. E situashon aktual ku ta reina na Venezuela ta loke ta reflehá bèk den e sifranan total for di e region di Sur Amérika. Un total di 6.092 bishitante a keda registrá na luna di yanüari 2014 for di Venezuela. Esaki ta un bahada di 4%. Motibu pa kua CTB ta bai enfoká e akshonnan di merkadeo mas den e otro paisnan for di region di Sur Amérika. Colombia i Sürnam tambe a konosé un bahada di respektivamente 4% i 24%. For di Colombia a registrá 917 turista di estadia i for di Sürnam 546. Brazil si a konosé un oumento di 15%. Durante e promé luna di aña 1.192 turista di estadia a keda registrá for di Brazil. Nort Amérika a registrá un bahada leve di 1% na luna di yanüari ku un total di 6.212 turista di estadia kompará ku 6.266 na 2013. Estádos Unídos a konosé un bahada di 13% ku ta un total di 4.112 turista di estadia. E region di Canada si a konosé un kresementu di 35%. Na luna di yanüari 2014 nos a risibí un kantidat di 2.100 turista di estadia for di e region menshoná.  E kresementu aki ta danki na esfuersonan di merkadeo kombiná ku 3 buelo pa siman for di Toronto, Canada ku e aerolinianan West Jet, Air Canada i Sunwing. Na 2013 nos tabatin 2 buelo pa siman pa Kòrsou for di Canada ku  Air Canada i West Jet. E aña aki nos tin e kompania Sunwing tambe ta hasiendo buelonan pa Kòrsou.