Estado Unídos a registrá kresementu di 18% na òktober 2017
WILLEMSTAD – 26 di novèmber 2017 – Ofisina di Turismo di Kòrsou (CTB) ta raportá kresementu ku dòbel sifra den turista di estadia for di Nort Amérika. E region tabatin un bon prestashon na luna di òktober 2017 registrando un kresementu di 16% kompará ku òktober 2016. E prestashon total di òktober a konosé un bahada di 7% no opstante e prestashon positivo di e region di Nort Amérika. Un total di 2.336 turista ménos a keda registrá na òktober 2017 hibando e total na turista di estadia na un total di 31.982 kompará ku 34.318 e mesun luna na aña pasá. E bahada den kantidat di turista di estadia ta basá riba e echo ku e kantidat di turista for di Venezuela te ainda ta afektando e sifranan total. Un kaida di 34% a keda registrá na luna di òktober. E diferensia den pèrdida di turista for di Venezuela ta ménos kompará ku e lunanan anterior. Na òktober 2017 un kantidat di 1.085 turista ménos a keda registrá, kontando ku un total di 2.112 turista di estadia.
Un total di 5.227 turista for di Nort Amérika a bishitá Kòrsou. Nort Amérika ta representá 16% di tur e turistanan ku a bishitá Kòrsou na luna di òktober e aña aki. Un kantidat di 4.332 turista di estadia a keda risibí for di Estado Unídos na òktober, registrando 18% kresementu kompará ku aña pasá. E oumento aki a keda registrá no opstante e echo ku e konekshon aéreo for di Charlotte tabata será na luna di òktober. Un análisis profundo den e prestashon di Estado Unídos ta ilustrá ku e tráfiko aéreo for di airport di Miami a krese ku 24% na luna di òktober miéntras ku for di airport di New York un kresementu di 95% a keda registrá. Canada tambe a krese ku 7% na òktober 2017. Kòrsou a risibí 895 kanades na òktober.
For di Europa a registrá un bahada di 2% na òktober ku un total di 17.810 europeo ku a bishitá Kòrsou. Aña pasá Kòrsou a risibí un total di 18.145 turista for di Europa. Europa ta representá 56% di tur e turistanan ku a bishitá Kòrsou na luna di òktober. Hulanda a registrá un bahada leve di 2% na òktober 2017. Solamente 299 turista hulandes ménos a keda registrá na òktober. Alemania a konosé un bahada di 9% na òktober 2017. Un total di 2.011 turista aleman a bishitá nos pais na òktober 2017. E pèrdida di konekshon aéreo for di Dusseldorf ta afektando e kantidat potensial di bishitante prosedente di Alemania i Hulanda. Datonan ta mustra ku bishitantenan bibá na Alemania a usa e konekshon via Amsterdam pa biaha pa Kòrsou. Ku e konekshon aéreo adishonal for di Amsterdam kuminsando na luna di novèmber ta spera ku por registrá kresementu for di tur dos merkado prinsipal den Europa.
Ménos kantidat di turista a keda risibí for di region di Sur Amérika, un total di 5.644 turista di estadia a keda registrá. E kaida aki ta debí na e bahada kontinuo den kantidat di turista di estadia for di Venezuela. Na luna di òktober Kòrsou a risibí 2.112 turista prosedente di Venezuela kual ta 34% ménos kompará ku aña pasá. Brazil i Colombia a presta bon kompará ku aña pasá. For di Brazil un total di 920 turista di estadia a keda registrá kual ta un oumento di 3%. For di Colombia e kresementu tabata di 8% na òktober 2017. Den sifranan apsoluto e kantidat registrá tabata 1.184.
No opstante e echo ku òktober a registrá ménos turista di estadia tòg por mira un oumento leve di 1% pa loke ta trata kantidat di anochi ku e bishitante a keda riba nos pais. Un total di 276.799 anochi a keda registrá kompará ku 275.392 na aña pasá. Region di Nort Amérika a registrá 24% mas kantidat di anochi di estadia. Tantu Estado Unídos komo Canada a registrá sifranan positivo; respektivamente 23% i 28% mas anochi. Turistanan for di Nort Amérika a keda 34.787 anochi na òktober 2017. For di Europa un bahada leve di 1% a keda registrá miéntras for di Hulanda un bahada di 3% a keda registrá. Total turistanan hulandes a keda 134.196 anochi riba nos pais.
Sifranan di yanüari pa òktober 2017
Un impakto direkto di 749 mion florin a keda generá pa nos ekonomia lokal di yanüari pa òktober 2017. Un impakto direkto total di 54.1% a keda generá for di turistanan prosedente di Europa kualnan ta responsabel pa un montante di 405 mion florin. Aña pasá europeonan tabata responsabel pa 393 mion florin pues ta trata aki di un oumento di 3%. For di Nort Amérika un oumento di 6% a keda kalkulá den término di impakto ekonómiko direkto. Turistanan prosedente di Nort Amérika ta responsabel pa 163 mion florin pa loke ta trata e promé 10 lunanan di aña 2017. Aña pasá nan kontribushon tabata 154 mion florin. Turistanan for di Sur Amérika i otro regionnan a generá respektivamente 135 i 46 mion florin e aña aki. Na 2016 e montante generá for di Sur Amérika i otro regionnan tabata 159 i 51 mion florin. E kantidat total ku e turista ta gasta ta keda derivá for di e kantidat di anochi ku e turista a keda riba nos pais. Tantu turistanan prosedente di Europa komo Nort Amérika ta kedando mas largu; esaki ta keda reflehá bèk den nan kontribushon na nos ekonomia lokal.
Un total di 325.141 turista di estadia a keda risibí durante e promé 10 lunanan di 2017. Aña pasá a registrá 367.337 turista di estadia durante e mesun periodo, esaki ta un bahada di 11%. Banda di e prestashon negativo di dos sifra den sifranan di yegada pa loke ta trata e promé 10 lunanan di aña, ta sigui mira un bahada leve di 2% den e kantidat di anochinan ku e turista a keda riba nos isla. Total turistanan di estadia a keda 2.915.889 anochi na Kòrsou.
64% di e kantidat total di anochi pa bishitante ta di turistanan for di Europa, representando 1.864.375 anochi for di e region aki den e periodo di yanüari pa òktober 2017. E kantidat di anochi registrá pa bishitantenan for di Europa ta mustra un kresementu di 3%. For di Nort Amérika, tambe e kantidat di anochi pa bishitante a krese ku 5%. Un total di 437.381 anochi a keda registrá durante e promé 10 lunanan di aña.