WILLEMSTAD:- Djasabra awor ta asina leu, lo presentá TEDxCuraçao 2018. TEDx ta mundialmente konosí pa presentashonnan ku ta inspirá i pa ideanan inovativo. Meta di TEDxCuraçao ta pa organisá un konferensia ku ta inová dor di trese un grupo di hende huntu den un ambiente dinámiko. Pa kompartí eksperensia, inspirá ideanan nobo i motivá otro. E oradornan di e terser edishon di TEDxCuraçao ta inkluí e.o Roël Calister, Veronique Toulon i Steven Coutinho. Nan lo kompartí nan eksperensia i konosementu ku e públiko di TEDx dia 14 di aprel próksimo na Villa Maria den Skalo.
Roël Calister ta bon konosí pa e ritmo i perkushon ku e ta presentá ku Kuenta i Tambú (KIT), na unda e ta kombiná e tambú tradishonal ku zonidonan ultramoderno hasiendo su tambotronic un eksperensia úniko durante kada presentashon. Ademas di esaki, Roël tin 2 skol di perkushon na Ulanda. Otro orador ku sigur lo sá di inspirá ta, Veronique Toulon ku definitivamente ta un trendsetter den mundu di beyesa i estilo. Veronique lo inspirá tur presente ku su eksperensia i ademas lo kompartí tokante e desishon di kambia un estudio den lei, pa awor su karera eksitoso komo pelukera. Sr. Steven Coutinho tambe lo presentá den TEDxCuraçao 2018, e ta èks direktor di RBC Dutch Caribbean i Sürnam. E lo inspirá tur presente pa mira nan propio komportashon i lo analisá skohensia di e partisipante, pa despues relashoná esaki ku estudionan evolushonario di sikologia i neurología. Coutinho ta indiká, “Despues di e TEDx aki, lo bo kambia bo manera di wak bo mes i bo komportashon.”
Total lo tin 11 orador- lokal i internashonal formando un meskla edukativo di inspirashon, i algun TED Talks interesante. Ademas di Roël Calister, Veronique Toulon i Steven Coutinho, tambe lo tei David Allen (keynote), Jasmine Sendar, Mark Tigchelaar, Priscilla Lotman, Joeri Oltheten i Joel Simonetti. Den e programa a krea espasio pa algun ‘break’ ku sigur lo sirbi komo relahamiento i duna oportunidat di kombersashon. E anochi ta klousurá ku un after-party inkluyendo un presentashon di Roël Calister i Dj Wynsel. Por kumpra karchi online via www.tedxcuracao.com i tambe na Miles Jazz Cafe, Bruna i Mensging’s Caminada. Pa mas informashon por bishitá e página di Facebook di TEDxCuraçao.