Willemstad October 11, 2018– Tur bista ta dirigi riba esfuersonan di un di e sostenedónan mayo den nos region di organisashonnan ku ta traha den e lucha kontra di kanser, esta CIBC FirstCaribbean, ora ku e banko organisá su Walk for the Cure dia 20 di Òktòber próksimo na Kòrsou.

E kaminata/kareda ku ta na benefisio di organisashonnan den henter region, lo uní miles di partisipante pashona den 17 pais den kua e banko ta opera. Tur loke keda generá pa medio di e kaminta aki na Kòrsou ta bai pa Stichting Prinses Wilhelmina Fonds.

Ta pa di 7 biaha ku CIBC FirstCaribbean ta organisá Walk for the Cure. Den e último seis añanan, e banko a logra rekoudá mas di USD 1.75 mion for di sostenedonan korporativo generoso i e diferente aktivitanan pa rekoudá fondo organisá pa e banko su empleadonan.

Tur fondo generá pa medio di Walk for the Cure i aktividatnan tene rondo di e evento ta bai pa asistí, kuido i konseho di pashènt i famianan meskos ku krea konsenshi pa medio di kampaña di edukashon den henter e region. E fondonan ta yuda tambe pa varios organisashon por asisti den kompra i mantenshon di ekipo pa diagnistiká i trata pashèntnan di kanser.

E aña aki CIBC FirstCaribbean na Kòrsou ta uní ku partnernan korporativo

Always, Antilliaans Dagblad, Amigoe, BTP, Curoil, Extra, Hyundai, LBH Group, NuCuraçao Windparken B.V. i Tampax pa presentá e Walk for the Cure.

E kaminata ta tuma luga dia 20 di Òktòber i lo kuminsa mitar di 6 di atardi. Registrashon ta tuma luga na CIBC FirstCaribbean na De Ruyterkade 61 riba dianan 15, 16 i 17 di Òktòber próksimo di 5 or pa 7 or di atardi. Karchinan ta kosta Nafl. 17,50 pa hende grandi i Nafl.10,- pa mucha. Promé i despues di e kaminta tin posibilidat pa chèk preshon i midi suku mientras muchanan por gosa lo maksimo den e area speshal pa muchanan kua lo tin bouncers.

Lysaira Ortela, Marketing Manager di CIBC FirstCaribbean na Kòrsou a bisa: “Nos ta gradesido na tur e patrosinadonan ku a uní ku CIBC FirstCaribbean pa trese e edishon aki di Walk for the Cure. Nos ta invitá un i tur pa ban ku nos i gosa di un kaminata agradabel den kayanan ku bista úniko di Punda i Pietermaai riba djasabra 20 di Òktober awor. Nos tin konfiansa ku nos komunidat lo bolbe brasa e Walk for the Cure e aña aki i hasi’é un gran éksito. Hasiendo esaki nos ta sostené e trabou balioso di Stichting Prinses Wilhelmina Fonds.”

E kaminata ta koinsidí ku Canadian Breast Cancer Foundation’s CIBC su Run for the Cure patrosiná pa e banko kompania madre esta CIBC. CIBC a bin ta sostené e evento aki pa mas ku dos dekada kontribuyendo ku miones na e investigashon den sosten na e lucha kontra di kanser na pechu.