WILLEMSTAD – Grupo di Seú Ambiente ta Tota ta kla prepará i por bisa ku tur kos ta kla pa Festival di Seú “ZOYA”.

E hóbennan Kionn Yung, Tennessee Donker i Donna Yung durante un enkuentro ameno ku prensa na Restourant Prime na Zuikertuin Mall, a presentá e detayenan pa loke ta trata e festival.

Segun e organisashon a trese padilanti, ta organisá e festival di Seú aki, p’asina sigui aportá na kultura di Kòrsou, tratando di kontagiá mas i mas hende i inbolukrá nan den kultura di nos pais. Ku e festival aki, e organisashon kier trata na atraé tambe turistanan ku kier sera konosí ku un parti di kultura di nos pais.

Del Monte di e prestigioso empresa Manrique Capriles ta ‘branding partner” di Festival di Seú “ZOYA” ku lo tuma lugá dia 15 di aprel próksimo, den Kurá di Arte na Pietermaai. E festival lo ta di 8 or anochi pa 2 or di mardugá. Lo bai tin presentashon di Grupo Rítmiko Hóben na Timon, Grupo Hóbennan Positivo i Aktivo, Grupo Kòmpèr, DJ-RO1, DJ Sandro i tur e Kantadónan Mayó di tur e 15 añanan lo bai ta presente, miéntras ku DONGO tambe lo t’ei kantando Seú.

Lo bai tin kuminda di Kòki Express, miéntras ku e bar lo tin un surtido amplio di bebida. Riba e pregunta kon bin lo tin un trùk ku ta bende kuminda ku no ta krioyo, e organisashon a splika ku komo ta trata di un festival ku un orario anochi pa bira mardugá, kumindanan stobá lo ta demasiado fuerte I hopi hende den oranan di anochi a kustumbrá di kumpra kuminda na trùk. Ademas, mester tene kuenta ku ta trata di un festival den un estilo diferente, kaminda e músika lo ta Seú, pero lo bai ta den un ambiente di un festival, ku entre otro efekto di huma, lus i mas.

Karchinan ta na benta na Beep Beep, 24 uur uit de muur, Mensing’s Caminada, Kòki Express na Sta. Maria i tambe serka miembronan di Grupo Ambiente ta Tota. Tambe por yama na 513-6563, 560-3737, 517-1194 i 522-2922 ku ta deseá 5 karchi òf mas.