Willemstad/Rijswijk, 19 di desèmber 2022 – Un konsepto di hotel di TUI na Kòrsou. Esaki tabata riba lista di deseo di e agensia di biahe di mas grandi di e isla ya pa hopi aña. I e deseo aki porfin ta kristalisá. Awe a pone firma bou di e akuerdo pa konstrukshon di TUI Blue Curaçao na Santa Martha (Bandabou).

Arjan Kers, Gerente General di TUI Hulanda: “TUI i Kòrsou ta konektá ku otro ya pa hopi aña. P’esei, awe mi ta sumamente orguyoso di por anunsiá ku nos ta bai realisá un prestigioso hotèl huntu ku famia Vogels i famia Alstede. Ta algu fantástiko ku nos por bai brinda nos klientenan den futuro un hotèl ku e asignatura di TUI. Esaki ta un tremendo atkisishon riba lokual ya nos tin di ofresé na Kòrsou. Santa Martha ta e lokalidat perfekto pa esaki, ku e ambiente outéntiko i situá na un di e playanan mas bunita di Caribe. Ku e hotèl aki Kòrsou ta haña un atrakshon turístiko adishonal kaminda ku nos ta spera di hasi hopi kliente kontentu.”

Konstrukshon di e hotèl ta den man di famianan Vogels i van Alstede. Famia van Alstede ku resientemente a konstruí e edifisio nobo di TUI na Willemstad, ta okupá prinsipalmente ku e aspektonan di konstrukshon di e proyekto. E famia hotelero Vogels (di entre otro Avila Beach Hotel i Lions Dive) ta enkargá ku e aspekto di maneho. Ta spera pa kuminsá e proseso di konstrukshon na ougùstùs di e aña próksimo. I si tur kos kana konforme plan, TUI Blue Curaçao ta habri su portanan den inviero di 2025.

Ekstra estimulo pa turismo
Desaroyo di e hotèl di TUI Blue lo duna turismo riba e isla un estímulo enorme. No solamente lo e yama bishitantenan di Hulanda bon biní. Ta spera ku turistanan di otro partinan di mundu tambe lo haña nan kaminda pa e konsepto di hotèl aki. Aparte di esaki e hotèl ta trese kupo di trabou i ta ofresé oportunidatnan di kresementu interesante pa e parti west di e isla riba tereno ekonómiko i turismo.

TUI BLUE
Hotèlnan di TUI Blue ta e hotèlnan premium di TUI. E hotèlnan elegante ‘all inclusive’ aki ta situá na lokalidatnan trankil den un ambiente di naturalesa i na hopi okashon kantu di laman. TUI Blue ta diseñá pa turistanan ku ta konsiderá un estilo di bida salú importante i ku ta buska na eksperensianan úniko semper. Den tur hotèl tin guia di Blue kla ku e mihó tepnan pa deskubrí e zona i e kultura lokal. E kòki ta kushiná ku ingredientenan lokal, i ta tene kuenta ku tur sorto di deseo di dieta i ta brinda eskoho amplio di platonan (biológiko). E hotèlnan di TUI Blue ta brinda tambe un programa amplio di deporte i ‘wellness’: BLUEf!t®. Por regla un seshon di deporte òf tratamentu di ‘wellness’ fasilmente ku e BLUE App®. Tambe por bestèl un bebida via di e app sea drumí riba bo kama òf kantu di pisina. Den e konsepto aki tin kuater formula: TUI BLUE for All, TUI BLUE for Families, TUI BLUE for Two i TUI BLUE Sensatori. E hotèl di TUI Blue na Kòrsou lo bira un TUI BLUE for All. E hotèl lo disponé di 300 kamber ku posibilidat pa amplia te 400 kamber. https://www.tui.nl/tui-blue/