Willemstan/Rijswijk, 10 di yüni 2022- TUI ta buskando 24 ‘cabin attendants’ nobo. Nan lo wòrdu rekrutá lokal i nan lo wòrdu en gran parti usá riba e ruta di Kòrsou, Aruba i Boneiru-Amsterdam, ku Kòrsou komo base.Durante ocho siman nan lo sigui un training i despues nan lo por kuminsá traha mesora.

TUI ta haña importante pa pasaheronan sinti nan mes konfortabel na bordo. Un elemento importante pa logra esaki ta ku e pasaheronan por wòrdu yudá na nan propio lenga. Esaki ta e motibu pa kual TUI ta buskando ‘cabin attendants’ Kurasoleño ku ta multilingual. Pasaheronan ta apresia  masha ku nan por komuniká den nan propio idioma. Rick van der Pluijm, kabesante di TUI Dutch Caribbean i Surnam: ” Tur dia nos ta risibí solisitut di personanan ku tin e deseo di traha komo ‘cabin attendants’ riba e ruta aki. Awor aki nos por kumpli ku e deseo ey, paso nos ta buskando èkstra koleganan ku e meta aki. Na e momentu aki nos tin 19 ‘cabin attendants’ i nos ke amplia e kantidat aki ku 24 mas.”

Despues di atkerí e reenfuerso aki TUI ta planiá pa pone 2 kolega multilingual na bordo di kada un di su 13 buelonan semanal. Ku adishon di e 24 koleganan nobo aki, lo bai tin 185 empleado trahando serka e kompania di biahe aki na Kòrsou, repartí entre e ofisina prinsipal, ‘cabin crew’ i e tiendanan di TUI. Pa mas informashon tokante e vakatura i solisitut, chèk e wèpsait  TUI.cw.