Un siman largo di promocion y presentacion. Diasabra awor nan ta presenta den Sabado Sensacional
ORANJESTAD, Aruba – 24 di november 2016: Diadomingo ultimo e cantantenan di e agrupacion Tsunami a sali rumbo pa Maracaibo, pa despues sigui pa Caracas, Venezuela, den un gira di un siman largo na nos pais bisiña. E compania promocional “Promovera” a tende nan cancionnan y a keda encanta, pa cual a manda busca e grupo pa haci un cantidad di aparicion na Venezuela, specialmente den media.
Algun siman pasa e compania di promocion a logra manda un ekipo di produccion di Sabado Sensacional pa Aruba, pa aki graba presentacion di e banda local. Nan ta encanta cu nan exito “Muchacha Linda”, cu ta produci specialmente pa e mercado internacional, cu enfoke riba e mercado Latino Americano.
Desde diadomingo a bishita diferente programanan na radio y canalnan di television. Nan a bishita e canal di television mas mira na Venezuela, esta Venevision y Venevision Plus, pa no lubida nan presentacion diasabra awor, dia 26 di november, den e programa Sabado Sensacional.
Riba su mes e programa aki ta un trampolin pa mayoria artista Latino Americano. Via e programa bo ta haya acceso pa otro paisnan, pa otro promotornan, cu na su turno ta traduci su mes mayoria biaha den oportunidadnan nobo.
Durante un entrevista na un di e radio emisoranan Venezolano, a considera Tsunami un banda diferente cu un sabor asambeho tropical. Aña 2017 ta habri di gran forma pa e banda Tsunami pero lo divulga mas na su debido tempo. Cu ayudo di Edselyn Figaroa, otro artista local, ta premira hopi sorpresa grandi y agradabel pa Aruba.
Despues di e gira aki, e delegacion di Tsunami ta regresa Aruba pa e prome siman biaha pa Colombia, unda lo keda 1 siman largo pa bishita diferente medio di comunicacion y promotornan. Na momento cu caba na Colombia, nan lo biaha pa Panama, unda lo permanece atrobe pa henter un siman, cu e mesun tipo di agenda, yena cu bishitanan den programanan di television y radio.
E banda tin contacto cu HTV, cu lo cuminsa promove nan videoclip asina cu nan caba e gira. E canal di television conoce e agrupacion caba, for di nan entrevista durante Aruba Summer Music Festival, pa cual nan a encanta nan presentacion, nan musica, nan energia y dinamismo contagioso.
A funda Tsunami na Januari 2003 y awendia ta cosechando exito pa mas di 13 aña caba. A saca un cantidad di cancion, produccion y CD nan durante nan trayecto musical. Awendia e banda ta conta cu un front, forma pa Shinton Arends, Mitch Almary, Maya Marin, Bradley “Easy B” Vesprey y Mervin “Blacky” Baptiste. Na tur e agrupacion ta conta cu 14 integrante, formando parti di Tsunami Entertainment Group.