Willemstad/Rotterdam – E agrupashonnan musikal Cache Royal i Gentz Tre’chic a uni forsa musikal i asina traha riba un kansion.

Diferente biaha e dos agrupashonnan akí na momentu ku nan ta presentá huntu riba tarima, e músikonan di e dos agrupashonnan sa switch i toka pa otro den un ambiente hopi amikal. Pues djei e idea a lanta pa dikon no traha un kansion konhunto i uni e forsanan musikal.

Pues pa prome biaha e dos agrupashonnan akí  ta uni forsa musikal pa komponé un kansion. Tantu parti di Cache Royal i Gentz Tre’chic e músikonan a duna nan aporte. “Nos So” ta título di e kansion di kual ta wòrdu intepretá pa Quinthony “Tsean” Thomasa i Randy Cordelia, mihó konosí  komo Randy Leroy. E komposishon ta di Derrel Titi de Palm, e letranan ta di Tsean i Randy Leroy kual e fushon di e dos kabayeronan akí ta hasi e kansion unu pa karisiá bo oído.

E kansion ta konta e momentu kon mundu ta para, ora “Nos So” ta zona kon bunita ta pa baila e kantika faborito akí, i kon imaginashon ta wòrdu husá ku no tin niun hende rònt pa stroba e momentu dushi akí den brasa di otro.

Awe durante di dia e kansion “Nos So” ta wòrdu lansá na tur radio emisora i riba tur plataforma riba ret sosial i ta wòrdu kompañá pa un videoclip tambe.