Willemstad – Ministerio di Desaroyo Ekonómiko (MEO) ta esun responsabel pa otorgá pèrmitnan ekonómiko na Kòrsou i tambe kontrolá kumplimentu di eksigensianan stipulá pa medio di esaki den negoshinan eksistente. Esaki ta konta tambe pa empresarionan ku ta ofresé, bende òf entregá merkansia òf servisio riba òf kant’i kaminda públiko ku ta mará na un lugá fiho. Lokal ta e asina yamá standplaatsvergunning (Pèrmit di Establesimentu). Últimamente MEO a konstatá ku tin diferente Trùk di Pan ku pa un motibu òf otro ta operá fuera di e orarionan stipulá den nan pèrmit di establesimentu.

Den kada pèrmit di establesimentu ta keda stipulá kua ta e orarionan ku e empresario aki ta permití pa habri su negoshi. Kantinanan mobil (trùknan di pan) no ta un eksepshon den esaki. De fakto, den e pèrmit di establesimentu ku ta keda otorgá na doñonan di trùk di pan a keda stipulá ku esakinan ta permití pa habri for di 9or di anochi te ku 6or di mainta.

Sinembargo MEO a tuma nota di diferente trùk di pan ku ta habri promé ku 9or di anochi, lokual no ta kuadra ku e reglanan vigente.

Den kuadro di esaki, Ministerio di Desaroyo Ekonómiko (MEO) kier a bolbe enfatisá  ku tur trùk di pan  mester kumpli estriktamente ku e orario di operashon stipulá den nan pèrmit.
Entrante otro siman lo inisiá un kampaña di kontrol intensivo, spesífikamente riba orario di operashon di trùknan di pan.