WILLEMSTAD – Awor ku e temporada ta kuminsá ku e meuchinan (Amerikaanse dwergsternen, sternula antillarum) ta bai brui – ku konosementu i konsentimentu di famia Bakhuis ku ta doño di e teritorio – a instalá na Kurá Tabako un tranké ku waya eléktriko na un parti chikitu di e kosta nort pa tene bestia ku ta yag riba webu, puitu i para adulto na distansia. Entre otro kachó i pushinan di mondi tin e maña pa ataká e paranan, tantu hóben komo adulto. Komo ku piskadó, siklista i gruponan riba vehíkulo motorisá (manera trike) tambe sa rondeá den e áreanan ei, a pone bòrchi ku mensahe kla pa atvertí i rekomendá pa skohe un otro ruta, pa keda leu for di e área spesífiko aki i pa asina laga e paranan ku ta brui na pas.

Aña pasá a resultá for di investigashon di e kolonia di meuchi ku miéntras nan tabata bai brui, nan tabata traha nan nèshi den un faha smalitu di tera di 2 kilometer di largura alo largo di nortkant. Ya ku no ta posibel pa sera henter e área ei, a skohe pa pone un tranké na únikamente un parti chikitu di alrededor di 100 meter. Nèt promé ku nan temporada kuminsá lo pone imitashon di para trahá di material artifisial aya, hustamente pa atraé e meuchinan pa bin brui na e sitio aki, miéntras ku kontinuamente ta hasi zonidunan di e paranan aki. Den eksterior mas biaha a logra lòk e meuchinan asina éksitosamente.

Durante e temporada di brui, ku ta dura te yüli mas òf ménos, lo monotoriá éksito di lòk e paranan pa bin na e área ku a  sera. Tambe lo hasi uso di e oportunidat pa hasi estudio di éksito di e periodo di brui i e kondukta di e paranan aki ku ta protehá pa lei.