Willemstad –For di djaluna 21 di Ougùstùs próksimo  lo kuminsa ku trabounan pa pone ‘vangrail’ riba Rooseveltweg na altura di Mirador te na e parti di e karetera kaminda e salida di aeropuerto ta situá. Ta pidi tur usuario pa tene kuenta ku lo tuma sierto medidanan di tráfiko durante e periodo aki. Durashon di e trabou lo ta tres siman, te ku medio Sèptèmber.

CWM lo ehersé e trabou pa Curaçao Airport Holding i Curaçao Airport Partners.

Durante e periodo di tres siman ku e trabou lo tuma lugá, lo tin un situashon adaptá, prinsipalmente entre 07:00AM i 17:00PM, kual lo nifiká entre otro ku e usuario lo mester kore mas poko poko den e area aki. Ophetivo di e adaptashon riba Rooseveltweg ta pa elevá e situashon di seguridat di tráfiko riba e parti aki di e karetera. Tur luna tin un kantidat di insidente ta tuma lugá den e area dor di negligensha di reglanan di tráfiko por ehèmpel prohibishon pa para riba e karetera òf parkermentu peligroso. Ta pidi tur usuario ku ta trafiká den e área pa tene kuenta ku e trabounan riba kaminda i pa kore ku koutela.