Un siman “Krioyo” ta loke CTB i CHATA a ofresé tur partner di Kòrsou na Toronto, Canada e siman aki. Un delegashon grandi di Ofisina di Turismo i Miembro nan di CHATA a forma parti di e asina yama “Sales Mission” den e merkado di Canada. 30 di Sèptèmber pa 3 di Òktober 2013 e delegashon di Kòrsou a organisá diferente reunion ku kompania nan di aviashon manera Westjet Airlines, Air Canada, i Sunwing pero tambe ku e miembro nan di prensa pa asina informá nan di e oportunidat nan di fakansi ku Kòrsou ta brinda komo destinashon. Ta bon pa menshoná ku tur anochi nos a organisá un sena edukashonal pa tur agensia nan di biahe na Toronto pa asina eduká nan di tur loke Kòrsou tin di ofresé. E miembro nan di CHATA ku a partisipá tambe a risibí e oportunidat pa presentá nan produkto. Segun Lizanne Dindial, President & CEO di CHATA, “Mi ta hopi kontentu di por a forma parti di e delegashon, e merkado di Canada ta hopi importante pa nos sektor. Nos ta premirá un kresementu di e merkado pa ku e “winter season” aki komo ku nos lo bai tin 3 vuelo pa siman direktamente for di Canada. Komo CHATA, nos a hasi uso di e oportunidat aki pa presentá nos miembro nan i pa asina krea un plataforma kaminda sektor priva konhuntamente ku sektor públiko, esta CTB por sera akuerdo nan di benta nobo, i krea aliansa fuerte pa yena e vuelo nan i alabes trese mas turista nos dushi isla Kòrsou. CHATA ta invitá un i tur pa keda na altura di su evento nan pa aña 2013, via su página di Facebook of subi nos website www.chata.org of “follow” nos riba twitter :http://twitter.com/_chata CHATA for di kuminsamentu di aña 2013, a introdusí e “slogan” nobo,“2013 – It’s all about Parntership” esaki ta enserá ku CHATA lo bai hunga un ròl importante pa trese tur e partner nan den sektor huntu. E vishon di mas grandi ta pa krea un diálogo duradero entre CTB, CHATA, Hotèl, Airlines i e Tour operatornan. CHATA ta kere firme ku si e partner nan aki traha huntu nos por krese komo destinashon turístiko i kosecha di tur e oportunidat nan ku ta presentá den e merkado. Finalmente CHATA kier a gradisi tur nos miembronan ku ta sigui kere den e esfuerso nan di CHATA, i tambe un danki na ofisina di Turismo di Kòrsou komo e partner ku a kristalisá e mishon aki.
E delegashon di Kòrsou a konsistí di: Avila Hotel, Baoase Luxury Resort, CHATA, CTB, Floris Suite Hotel, FunBini/Taber Tours, Hilton Curacao, Lions Dive Beach Resort, Livingstone Resort, Marriott Curacao, Ocean Encounters, Papagayo Resort & Design Hotel, Santa Barbara Beach & Golf Resort, Sunscape Curacao Resort, Spa & Casino,Tropical Tours.
– CHATA – –It’s All About Partnership!