WILLEMSTAD – Djamars awor dia 22 di yüli 2014, Freewinds ta organisá un konsierto grátis pa pueblo di Kòrsou ku e konosido kantante Toni Worrel. Despues di e eksitoso konsierto di WESU Jazz siman pasa, djamars awor ta toka tur no na e kantante Toni Worrel pa e karisia tur hende ku su stèm bunita, kantando kansionnan di ayera i awe. Kompañamentu Musikal lo ta na enkargo di The Freewinds Band, kual ta un banda ku ta konsistí di músikonan di e barku Freewinds mes, huntu ku e Brass lokal, forma pa Norman Kooks, Giovanni Atalita i  Norbert Girigorie, mihó konosí komo “The NGN Brazz). Manera ta konosí, Freewinds despues di 8 siman ku nan tabata na Karibe Oriental, ta bek na Islanan di Aruba, Boneiru i Kòrsou ku ta nan base, i tur biaha ku nan ta na Kòrsou, ta tene show pa  pueblo di Kòrsou. Den kaso di Toni Worrel, e no ta un deskonosí riba e barku, ya ku den pasado el a yega di presentá na vários okashon, inkluso ku su skol di músika, kaminda e ta preparando masha hopi hóben pa bira kantante. E shou di djamars awor ta kuminsá eksaktamente pa 8 or di anochi. Entrada ta grátis, pero mirando ku e espasio no ta hopi grandi, ta 300 hende so por tuma pa konsierto i p’esei esnan ku ta interesá na  akudí, mester registrá pa asina ei por manda e karchinan digital. Por yama Giovanni Atalita na 567-3227 pa mas informashon. Freewinds ta kontentu di ta bek na Kòrsou i ta organisá konsierto na nivel haltu pa pueblo. Djamars awor ta un dje okashonnan aki.