Godalys Reina, DTM eligí den tòp di Direktiva di Karibe

Komunidat di Toastmasters di Kòrsou ta orguyoso di anunsia kandidatura di un di nos miembronan den direktiva di Toastmasters di Karibe, Distrito 81. Toastmaster Distiguí Godalys Reina a keda eligí na puesto di Direktora di Merkadeo o sea “Club Growth Director”, formado parti di e tòp tres ku lo guia e Distrito di Karibe pa aña 2015/2016. Distrito 81 ta konsistí di 26 teritorio di islanan den Karibe ku ta ekspandé foi Haiti te Guyana. Toastmasters di Karibe ta konta ku mas di 3.500 miembro di 145 klup representando islanan franses, hulandes, spañó i ingles. Elekshon pa direktiva 2015/2016 a tuma lugá na e pais di Haití wikènt pasá durante reunion anual di miembresia i Godalys Reina a keda eligí ku mas di 80% di voto na su fabor. E puesto di “Club Growth Director” ta enserá pa traha riba miembresia di e organisashon ampliando e base di 145 klup repartí riba e 26 teritorionan di moda ku mas individuo ta sera konosí ku e programa di kresementu personal di Toastmasters. Kreando asina mihó komunikadornan i mas lider den komunidatnan di Karibe. Nos tin konfiansa ku Godalys Reina lo hasi un bon trabou den e puesto aki mirando e trayektoria amplio i e sostén di su koleganan Toastmasters ku e tin. Pa menshoná un par e aña aki ya e tabata den e direktiva di Distrito 81 komo sekretaria kaminda el a hasi un tremendo trabou i laga su profeshonalismo bin dilanti. Komo individuo el a sabi di desaroyá su mes den e organisashon i logra den e mas di 19 aña aki e distinshon di mas haltu ku a Distinguished Toastmastes (DTM). E ta un di e Embahadornan pa e programa di Revitalisashon di Toastmasters International aki na Kòrsou. Komo presidente di su promé klup ku e tabata miembro el a sabi di guia e klup na distinshon di President Distinguished Club, komo di Direktor di Area, Select Distinguished Area. El a yuda lanta e promé klup di hobennan afiliá na Toastmasters ku ta e promé Gavel Club na Korsou pa hobennan di diferente kasnan pa kuido residensial (internat). El a aportá na diferente proyektonan den komunidat pa yuda forma hobennan esun mas resién ta “Manera mi Bos no tin Dos” den koperashon ku JCI. Su dinamismo no ta solamente den komunidat di Toastmasters pero el fungi komo Direktora di Handicap Rights Foundation, durante kua periodo e tabatin su propio programa di radio. E tabata tambe direktora na Kinderoorden Brakkeput i aktualmente Direktora na Pro Kuido N.V. i miembro aktivo di PAR. Tur esakinan e ta atribui na su kresementu i desaroyo den Toastmasters. Sigur riba nivel di Karibe nos ta sigur ku DTM Godalys lo pone su stèmpel i kontribui en grande pa e komunidat di Toastmasters di Karibe inkluso su isla natal Kòrsou. P’esei nos ta dese’é tur klase di éksito i nos ta orguyoso di dje.