WILLEMSTAD. Aprel 2013:- Resientemente Kòrsou tabata anfitrion di miembronan di prensa for di Alemania i tambe representantenan di Timmendorfer Strand Niendorf Tourism, esaki pa konkretisá un laso di promoshon i labor ku a keda firmá resientemente na Oropa. Na e enkuentro ku prensa, medionan di komunikashon lokal tambe tabata presente pa tuma nota di e akuerdo importante aki. Ofisina di Turismo Kòrsou (CTB) i Timmendorfer Strand Niendorf Tourismus GmbH resientemente a inisiá un partnership ku Cas Abao Beach ku lo benefisiá Kòrsou den merkado Aleman, ku ta un merkado kresiente pa nos isla. Ku e partnership aki ámbos entidat turístiko lo benefisiá di interkambio qua eksperensia i konosementu. Ademas di esaki e partnership lo sòru pa aktividatnan i oumentá e kantidat di bishitantenan di Cas Abao Beach. 

Internashonalmente Cas Abao Beach a keda nominá komo un di e playanan di mas bunita na Kòrsou i di akuerdo ku TripAdvisor na mundu tambe. Cas Abao Beach su santu blanku manera kristal i su awa koló turqois ya ta un garantia pa un eksperensia inolvidabel. E playa tin su propio bar, restorant, servisio di masashi, baño i oportunidat di buseo. Tur esaki sigur a yuda konkretisá e partnership entre Cas Abou Beach i Timmendorfer Strand ubiká den Baltic Sea na Alemania kual na su turno tambe ta un di e playanan di mas popular na Alemania i bishitá pa mas ku 180.000 bishitante tur aña.  Cas Abao Beach ta un playa ku ta atraé públiko di tur edat i fásilmente por bira un destinashon familiar pa e turista aleman. Tantu Cas Abao Beach na Kòrsou komo Timmendorfer Strand na Alemania tin e mesun grupo komo meta. CTB i Timmendorfer Strand Niendorf Tourism ta mira e partnership aki komo un interkambio kultural permanente ku lo benefisiá tantu Kòrsou i Alemania. Tambe lo desaroyá un programa edukativo pa studiantenan ku mester pasa nan stage den sektor turístiko. Pa CTB e partnership ku Timmendorfer Strand Niendorf Tourism ta ideal, ademas di esaki ta pone den ‘spotlight’ un di nos playanan di mas bunita. “E akuerdo aki ta masha importante pa nos kresementu den merkado di Alemania. Internashonalmente e partnership aki a wòrdu masha bon risibí i a hasta wòrdu konsiderá un ‘unicum’. E benefishinan di e asina yamá ‘Beach Partnership’ ta multiple; komo destinashon Kòrsou ta keda posishoná un biaha mas den e listanan faborito, e interkambio di konosementu via di e programa di estudio ku a keda inkorporá den e akuerdo tambe ta algu fantástiko i asina por keda menshoná diferente detaye ku lo kaba di koroná e promoshon kuantioso ku Kòrsou ta risibí na Alemania. Ideal ta, pa nos siña for di otro via di un interkambio permanente, implementá ideanan nobo i diseñá un plan di merkadeo pa asina keda garantisá éksito pa tèrmino largu”, esaki di akuerdo ku Sr. Ghatim Kabbara CEO di CTB.