WILLEMSTAD – E no tabata algu úniko. Den pasado un tim femenino a yega di partisipá na e anual torneo internashonal di peska di Curaçao Yacht Club (CYC). Pero último añanan solamente un tim femenino for di Aruba tabata partisipá. E aña aki kos a kambia bèk.

Pa e di 50 edishon di e torneo di peska durante e fin di siman tras di lomba tabatin atrobe un tim femenino di Kòrsou, patrosiná pa Sambil Curaçao. Arti Wever di NAPA Autoparts a pone e yate ‘Zipper’ disponibel pa durante dos dia siguí sali en buska di e piskánan grandi riba un laman bastante brutu. E pakus Columbia den Sambil a opsekiá e unifòrm. Jonathan Jonckheer a fungi komo kapitan, miéntras ku Nigelino da Costa Gomez i Zeno Lotman a coach e damanan. E otro tim femenino tabata for di Aruba na bordo di ‘Reel Teasers’.

E tim lokal tabata konsistí di Mary Anne Goiri, Cristina Garcia Martinez, Susana de Faria i Archangela Garcia – riba potrèt. Dos di nan ya tabatin sierto eksperensia, pero pa e dos otronan esaki tabata un eksperensia kompletamente nobo. E tim aki no a kai den premio (ainda), pero e damanan a mustra balentía i no a maria. E kèch tabata tiki, pero esaki no a afektá nan ánimo. Ta bini aserka ku ora nan tabata hala un bon buní aden, un tribon a kue pida rabu kita afó. Ohalá e tim aki a stimulá mas hende muhé pa partisipá na futuro torneonan di peska.

Ta bon pa menshoná tambe ku a kai na agrado ku Cinemark a pone 200 karchi di sine disponibel pa e hóbennan ku a partisipá na e kompetensia spesial pa nan den evento aki.