WILLEMSTAD – Durante siman pasá miembronan di e tim di Programa di Urgensia tabatin un siman intensivo, kaminda ku nan a sigui kursonan i tayérnan pa amplia nan konosementu. Di e manera aki nan por sigui traha na bienestar di Kòrsou. Esaki ta den kuadro di e trabounan ku ta tumando lugá pa kumpli ku e meta prinsipal di e Programa di Urgensia. Programa di Urgensia ta un programa di akshon dirigí riba mehorashon di e situashon di biba i traha pa pueblo di Kòrsou. E programa aki aktualmente ta ser implementá den kuater bariodi Kòrsou, esta Montaña, Buena Vista, Otrobanda i Barber. E intenshon ta pa usa e barionan aki pa krea un modelo ku lo por ser implementá den demas barionan di Kòrsou.

Den e siman di 4 pa 8 di desèmber último e kordinadó di e Programa di Urgensia, señora dr. Jurenne Hooi tabata na Kòrsou i a fasilitá e tayérnan. E timnan di transishon di kada un di e barionan, huntu ku e kordinadónan di kada bario i tambe representantenan di SOAW, a sigui e kurso i tayérnan aki. E tayérnan a konsistí di entre otro kon pa plania i implementá proyektonan efektivamente, kon pa traha un mapa sosial di kada bario i mas. Den luna di yanüari 2018 señora dr. Jurenne Hooi lo regresá Kòrsou un bia mas pa sigui duna sosten i kursonan na e timnan di transishon di e kuater barionan ariba menshoná. E timnan ta sigui traha riba nan meta pa mehorá kalidat di bida den barionan di Kòrsou.