Willemstad- Tim Citco ta logra bira e Ganado (overall winner) di e promé edishon di CIBC FirstCaribbean su Golf for the Cure Charity Tournament miéntras ku Tim Osteria Rosso ta logra e segundo lugá.

Addy Toppenberg i Camilo Quast (di apenas 8 aña) a dal e “drive” di mas largu miéntras ku Gianni Schob i Bob Hitijahubessy ta yega mas serka di e “hole”. No ménos ku 19 tim a partisipá djasabra último na e promé edishon di e CIBC FirstCaribbean Golf for the Cure Charity Tournament riba e kancha di gòlf di Blue Bay Curaçao Golf & Beach Resort. E evento a keda organisá komo parti di esfuerso di CIBC FirstCaribbean su Walk for the Cure pa rekoudá fondo pa e lucha kontra di kanser.

Banda di a disfrutá inmensamente di un dushi dia durante di e CIBC FirstCaribbean Golf for the Cure Charity Tournament, e gòlfistanan ku a partisipá, a kontribuí tambe na un kousa na kua CIBC FirstCaribbeqn a bin ta kontribuí na dje durante di e ultimo 6 añanan. CIBC FirstCaribean su Walk for the Cure ta na benefisio di organisashonnan den lucha kontra di kanser den region. E ta unifiká mas di 22 mil partisipante den 17 pais den kua e banko ta operá den un demonstrashon di komprimiso pa yuda esnan afektá pa kanser. E kantidat di fondo generá durante di e ultimo 6 añanan pa medio di e insiativa aki ta sumá USD$ 1.75 mion.

“Tur e fondonan generá ta keda usá pa duna asistensha, kuido i konseho na pashèntnan ku kanser i nan famianan méskos ku krea konsenshi dor di kampañanan di edukashon tokante di kanser.” asina Sra. Frieda Geller Vise Presidente di Stichting Prinses Wilhelmina Fonds a bisa.

“Nos banko ta ofresé servisio i produktonan den 17 pais rònt Karibe. Nos a bin ta kontribuí na e kousa aki den tur e teritorionan kaminda nos banko ta operá. Nos, komo e organisashon ku ta aportá, ta kompronde e dolo i pèrdida ku kanser ta okashoná. Golf for the Cure tabata netamente pa krea konsenshi i kontribuí na hasi bida di esnan ku tin kanser, un tiki mas konfortabel ” asina Sr. Edward Pietersz, Country Head di CIBC First Caribbean na Kòrsou a bisa.

E promé edishon di CIBC FirstCaribbean Golf for the Cure Charity Tournament a bira posibel danki na sosten balioso di ko-patrosinadó Gillette. Mas aleu Audi, BMW, Mitsubishi, Massy United Insurance, Jeep, Kyoto, Osteria Rosso, Blue Bay Curaçao Golf and Beach Resort, Divi Divi Air, Divi Village Golf and Beach Resort Aruba, Antilliaans Dagblad, Amigoe, Extra, Dolfijn FM, Jingle Planet, Kevin Carty, Gonzalo Cuales, Barefoot, Coca Cola i Polar tambe a sostené na e evento.