Den forma di un dia di apresio na kliente ku e mensahe “Let’s grow together”

Selebrando nan di dos aniversario The Business Factory B.V. a organisá un dia di apresio na kliente djaweps último. The Business Factory B.V. ta un empresa ku ta duna asistensia empresarial riba tereno di atministrashon i impuesto, rekurso humano, merkadeo i asistensia empresarial general na esnan ku ke bai kuminsá nan mes negoshi i tambe na negoshinan eksistente kaba. The Business Factory B.V. a bira operashonal ofisialmente na yanüari 2013 i a posishoná su mes riba merkado komo un “one-stop shop” pa tur asuntu empresarial. Djaweps último The Business Factory B.V. a organisá su segundo “Client Appreciation Day” den kuadro di selebrashon di nan di dos aniversario. Durante e seremonia e direktor, Sra. Raycine Decaster-Godfried a splika ku “Client Appreciation Day” ta un dia spesial kual ta ser dediká na tur kliente di e empresa pa yama danki pa nan konfiansa durante e aña ku a pasa, enfatisando ku sin nan no tin motibu pa selebrashon. Tambe ta un oportunidat pa klientenan di e empresa konosé otro ku  por ta un potensial kliente pa nan tambe. Na The Business Factory nos ta balorá i apresiá nos klientenan i esaki ta nos manera di duna bèk. Tambe Sra. Decaster duna di konosé di ta hopi kontentu ku e aña ku a pasa komo ta klientenan mes ta sigui rekomendá mas kliente na nan i p’esei durante e seremonia a entrega un “award” na 2 kliente en espesial kual ta esnan ku a trese mas kliente pa nan e aña ku a pasa. Mas aleu a kompartí nan logronan di e aña ku a pasa i tambe plannan pa 2015. Durante e atardi sumamente ameno na ofisina di The Business Factory B.V. a brinda pa un aña eksitoso, klientenan por a interkambiá ku otro, disfrutá di algu di kome i bebe i na final tambe a risibí un regalito den forma di un mata ku e mensahe “Let’s grow together”!  Por tuma kontakto ku The Business Factory B.V. na telefon 766-0083 of e-mail info@businessfactory-cur.com.