Djasabra 24 òugustus awor, entre 4-12pm e di tres edishon di Kaya Kaya ta tuma luga na Ser’I Otrobanda.

Kaya Kaya ta muchu mas ku un ‘streetparty’. E ta tambe un proseso den e bario ku ta traha riba kuater pilar di desaroyo. E pila sosial ta pa progreso di habitantenan, fisiko ta pa e bario keda kada biaha mas miho y bunita atras, e pila ekonomiko su meta ta pa krea mas entrada pa e bario y tur ku ta partisipa, y e pila kultural tin komo meta pa krea diferente ekspreshonnan artistiko y ku ta brota bira un fiesta fantastiko ku ultimo biaha mas ku shete mil persona a bishita.    

Sabiendo e popularidat kresiente di Kaya Kaya, e edishon aki nos ta spera mas bishitante y ta preparando pa risibi tur. E area unda Kaya Kaya e biaha aki ta bai tuma luga ta mas amplio. Esaki ta entre e kayanan Ferdinandstraat, Emmastraat, Willemstraat, Frederikstraat y Kaya Augusto Fraai.  

Pa realisá un kresementu asinaki ta solamente posibel ku koperashon di diferente persona, organisashon y empresa komo partner.  Pa 2019 nos ‘branding partner’/sponsor mayo ta ENNIA. Kende ta kontribui pa tin un eksploshon di obranan di arte den e bario y tambe den konteksto di nan slogan ‘sintibo sigur’ ta hasi posibel pa nos por traha ku sr. Thakai Doran , di empresa Texperience kende ta responsabel pa e asina jama  ‘crowd management’.  

Otro partnernan importante ku tambe ta hasi Kaya Kaya posibel ta  MCB Bank, Fundashon Bon Intenshon  y CTB, kende entre otro lo hasi e fiesta di 24 òugustus awor posibel y ta kontribui huntu ku ENNIA pa yuda garantisa kontinuidat di Kaya Kaya y tambe kuido di nos medio ambiente.

Kaya Kaya Cup dos tiru den un

Entrada, meskos ku e prome dos edishonnan e biaha aki ta pòrnada. Esaki a hasi realisashon y kontinuidat di e festival, aunke tin bon koperashon un reto. Pa garantisa e kontinuidat y na mesun momentu kopera ku nos medio ambiente (Go Green), nos a pensa un solushon kreativo ku ta resolbe dos reto den un bez. E aña aki enbez di cup di karton, tur bishitante ku ke bebe algu lo mester kumpra un cup di plèstik duru, ku nos lo ofrese den diferente tamaño y lo kosta entre fl. 2.50 y fl. 10. Durante e evento lo no permiti pa trese bebida propio y tampoko bebe den otro cup.  Mira esaki komo bo kontribushon pa huntu nos por tin hopi Kaya Kaya mas.

Otro partners ku ta hasi e edishon aki posibel ta AVF, FKP y Kooyman. Nos a invita FKP pa yuda nos laga Ser’I Otrobanda ‘better behind’ y nan a responde positivamente y ta bai yuda nos limpia, adelanta un mantenshon plania y huntu ku AVF ferf e 30 kasnan ku urgentemente mester di atenshon. Manera ta parti nos tradishon, ora nos invitabo bin nos kas, e mester ta na òrdu.

Kooyman tin interes pa huntu ku su trahadonan krea algun di e areanan bashi den espasionan di enkuentro pa habitantenan por sigui topa otro.