Selebrando di sinku aniversario

WILLEMSTAD – Maduro & Curiel’s Bank durante un resepshon na Restorant Ginger den Pietermaai a hasi entrega di e di sinku Premio Komersiante Briante. Premio Komersiante Briante ta un premio ku MCB ta otorgá anualmente na un persona, organisashon òf instituto ku a hasi algu ekstraordinario na benefisio di e sektor di Empresa Chikí òf na un empresa ku a sobresalí na Kòrsou. Komersiante Briante ta nòmber di e símbolo ku ta identifiká Maduro & Curiel’s Bank su Departamentu di Empresa Chikí (Small Business Banking). E símbolo ta un pòpchi ku tin un pera di lus riba su kabes i ta ilustrá e empresario chikí ku ta aserká Bo Banko Amigu ku su idea briante pa su negoshi i kon Maduro & Curiel’s Bank su Departamentu di Empresa Chikí ta bai e “extra mile “ pa yuda kristalisá e idea aki.

Ku Premio Komersiante Briante, Bo Banko Amigu ta sigui stimulá i tambe konsientisá otronan pa sigui ku nan esfuerso pa e sektor tan importante aki pa nos ekonomia, e sektor di Empresa Chikí. Un komishon interno ta hasi investigashon i ta determiná e nominadonan for di kua ta nombra un ganadó apsoluto. Ganadonan di añanan anterior tabata entre otro e korant Empresa Chikí di Kámara di Komèrsio, sra. Caprice Augusta di Kabei Kabei Incubator, Elite Hair Care Salon bou di maneho di sra. Leonor Migala Nisia i aña pasá a toka turno na Skèmpi bou di maneho di sr. Gino Jacobs i sr. Boudino de Jong. Nominadonan pa Premio Komersiante Briante 2015 ta:

• Sai Digital B.V.
• Curacao Ecocity Projects N.V.
• Fretzia Fruit and Flowers.
• Mariluz Manuela dba Naturals Curaçao.
• Tera Percussions.
• Urban Chase.

E ganadó apsoluto di Premio Komersiante Briante 2015 a resultá Tera Percussions di señora Tatiana Saturnino-Felix. Tera Percussions ta un negoshi lokal ku ta traha instrumento di perkushon di alta kalidat na man. E instrumentonan aki ta wòrdu eksportá internashonalmente i rekomendá dor di músikonan grandi di Ricky Martin, Alicia Keys i Baby Face. Tambe Tera Percussions ta duna lès regularmente na muchanan. Asina nan tambe por siña e arte di traha instrumento di perkushon. Mirando ku e instrumentonan aki ta internashonalmente rekonosé i ku e proyekto aki ta traha riba edukashon di nos muchanan i desaroyo di nos hisotria lokal, MCB a otorgá e Premio Komersiante Briante e aña aki na Tera Percussions.

En konekshon ku Premio Komersiante Briante su di 5 aniversario, MCB a hasi entrega di Premio Rekonosementu Spesial. E ganadó a resultá Fundashon Negoshi Pikiña, kual tabata nominá den 2011 i 2014. Fundashon Negoshi Pikiña ta stimulá desaroyo di negoshantenan den nos sosiedat dor di organisá diferente aktividat pa e grupo spesífiko aki. Maduro & Curiel’s Bank ta felisitá tur e nominadonan i Tera Percussions, ganadó di Premio Komersiante Briante. Bo Banko Amigu ta enkurashá un i tur pa sigui sostené e sektor di Empresa Chikí i tambe ta yama danki na un i tur ku di un òf otro forma a sostené e sektor aki.