Durante di e edishon di Curaçao North Sea Jazz Festival ku ta tras di lomba, Tera Percussions a demonstrá un biaha mas ku nada no ta imposibel. E promé conga nan a keda traha na Kòrsou i debutá riba “Etta James Stage” na momento ku perkushonista i ganadó di Grammy Award Pernell Saturnino a presentá ku su grupo! Conga ta e instrumento perkusivo ku mas ta keda usá rònt mundu i awor Kòrsou tambe por ta orguyoso di ta produsí su propio konga nan di kalidat haltu. Algun luna atras a surgi e idea pa traha e promé konga nan na Kòrsou pa nos perkushonista di fama internashonal por a debutá riba nan durante di su presentashon na CNSJF 2013. Tabata un “challenge” ku Tatiana Saturnino-Felix no a mira imposibel pa logra. Ennia i Curinde NV tambe no a duda ku Tatiana lo por a traha e konga nan i a spònser Tera Percussions pa por a kumpra tur material nesesario pa por a traha e instrumènt nan. Huntu ku su “dream team” Judy Daf i Sabina Evertsz Destrade Mora nan a buta man na obra. Un dia promé ku CNSJF ranka sali, e konga nan a keda kompletamente kla. Na momento ku Pernell a anunsiá riba stage ku ta Tatiana Saturnino-Felix (kasá di Pernell) a produsí e conga nan, públiko a emoshoná i a “chant” ‘Tera Percussions! Tera Percussions!’ i Pernell a kue un solo riba e conga nan pa públiko tende kon e conga nan ta zona. Tur hende a biba ku Tatiana i Crew ku e for di komienso te dia di Pernell su presentashon ku e trahamentu di conga sea dor di potrèt nan òf mini clips nan ku e tabata post riba Facebook. Pa hasi e proyekto aki unu inmortal, nan a filma hinter e proseso ku pronto tur hende lo por mira kon e proseso di traha e conga nan a bai. Loke ta asina impreshonante ta ku hopi músiko ku a bishita nos isla den kuadro di CNSJF ker a bishita e “head quarters” di Tera Percussions i músiko nan manera e harpista Edmar Castañeda no solamente a bishita e “head quarters” pero tambe a kumpra su bongo cajon i awor orguyosamente ta biaha i propaganda Tera Percussions unda ku e bai. Hopi di e músiko tabata impreshoná ku e konga nan di Tera Percussions. Komentario positivo so tantu Pernell i Tatiana a risibí di un i tur ku a tèst i toka riba e conga nan. E conga nan a hasi asina tantu impakto ku awor Tatiana i Pernell a keda aserka pa 2 kompania na Merka pa kuminsá distribuí e conga nan traha na Kòrsou di Tera Percussions. Tera Percussions sigur sigur pronto lo purba na habri nan propio store na Merka (NYC). Musiko nan internashonal manera Paquito d’Rivera, David Sánchez, Edmar Castañeda, Tony Escapa (Drummer di Ricky Martin), Brandon Coleman (painista di Babyface i Alicia Keys), kantante Giovanca i Shirma Rouse pa menshoná algun tur ta músiko nan ku ta support Tera Percussions all the way. Tambe instrumènt nan di Tera Percussions ya a keda usá pa graba entre otro riba CD nan di WDR Big Band na Alemania, Chick Corea su último CD “The Vigil” i tambe CD nobo di Giovanca “Satellite Love”. Tera Percussions ta bende ya kaba na Merka, Europa, Puerto Rico i Hapón. Tera Percussions sigur lo pone Kòrsou su nomber na haltu riba un tereno ku nos no tabata konosí pe anteriormente. Pa mas info bishita nos riba nos website www.terapercussions.com i/òf nos pagina di Facebook “Tera Percussions”. Tambe por yama na 5179777.