Willemstad – E luna akí Tempo Curaçao a prolongá su areglo di penshun kolektivo ku ENNIA i a skohe pa huntu ku ENNIA sigui invertí den futuro di su empleadonan.

“Tempo ta un dunadó di servisio na HR ku ta para pa profeshonalismo i kalidat”, sigun Jahira Sillé, Branch Manager na Tempo Curaçao. “Nos ta distinguí nos mes ku nos enfoke riba kliente i servisio, tantu interno komo eksterno. Nos empleadonan ta hopi importante pa nos, i p’esei Tempo ta perkurá pa nan futuro ku un penshun di ENNIA. Durante e añanan ku a pasa nos tabatin un bon koperashon ku ENNIA, i nos ta hopi orguyoso ku nos por sigui ofresé nos empleadonan un penshun di ENNIA.”

Pa su empleadonan Tempo tin un areglo di penshun kolektivo basá riba un sistema di prima disponibel. Den kaso di un areglo asina akí, ta stipulá e prima ku e dunadó di trabou ta paga adelantá i e ta dependé di salario di e empleado. Ta usa e promé parti di e prima pa e seguronan ku ta ofresé sostén finansiero den kaso di fayesementu i invalides, i ku sobrá di e prima ENNIA ta perkurá pa e penshun.

ENNIA ta felisitá Tempo Curaçao i su empleadonan ku kontinuashon di nan areglo di penshun trahá na midí i ta gradisí Tempo pa e konfiansa ku nan a mustra den ENNIA.