Den presensia di entre otro promé minister di Kòrsou, Daniel Hodge, presidente di parlamentu, Mike Franko, direktor general di UTS, Paul de Geus i vários otro dignatario i invitado mas, a duna inisio djamars dia 2 di aprel 2013 di a kampaña “é bon yu di Kòrsou”. E kampaña aki, kual tin komo meta prinsipal pa trese un aliento positivo bek den nos komunidat, ta un inisiativa di TeleCuracao. Gerente general di TeleCuracao, Hugo Ley Yen Tai a splika ku den e kampaña aki lo definí “é bon yu di Kòrsou” basa riba diferente kriterio. Esakinan ta entre otro stimashon pa su pais, honestidat, rèspèt, sentido di pordoná, humildat, sinseridat, toleransha, perseveransha, amabilidat, kompashon, servisial, lealtat, higiena, sentido di trabou, fieldat, stimashon pa su próhimo, komportashon (den tráfiko, ambiente sosial), kreensha den un Ser Supremo, rèspèt pa su medio ambiente, disponibilidat pa yuda, kumpli ku leinan, no ta envidioso, sentido di kompartí, etc. Ku otro palabra, “é bon yu di Kòrsou”  no tin un nashonalidat ni rasa.”E bon yu di Kòrsou” ta un forma di komportashon. Pues hasta e merikano por ta un bon yu di Kòrsou si e komportá su mes segun e normanan aki, segun señor Lew Yen Tai a trese dilanti. E la añadí ku ta e intenshon pa TeleCuracao bai na dekretá empresa, skol, instituto , organisashonnan, etc., komo instansha “Bon Yu di Kòrsou”, loke ta nifiká ku ora un kliente drenta por ehèmpel un empresa dekretá komo “Bon Yu di Kòrsou”, e tin garantisá ku e ta topa empleadonan honesto, servisial i  amabel pa yud’é. “I na momento ku bo lubidá bo pòtmòni den un empresa “Bon Yu Di Kòrsou” , bo ta sigur ku ora bo bin bek bin busk’é, bo ta hañ’é”, segun e direktor di TeleCuracao a remarká. Direktor general di UTS, Paul de Geus a trese dilanti ku no mester sorprendé ningun hende ku e inisiativa aki a sali di Kòrsou su planta nashonal TeleCuraçao. Esaki pasobra TeleCuraçao, meskos ku tur e otro kompanianan ku ta forma parti di e famia di UTS, ta komprometé ku desaroyo di nos pueblo. “Ta p’esei mes, semper nos a sostené aktivamente hopi esfuerso pa desaroyá kultura, arte, deporte i formashon den, di i pa nos komunidat.  Nos ta konvensí, ku banda di e parti di negoshi, di ofresé produkto i servisionan inovativo na preis kompetitivo, nos tin tambe e deber di usa nos rekurso i nos plataformanan komo estímulo den e esfuerso pa krea un nashon di Bon Yu di Kòrsou”, e direktor di UTS a indiká. Señor de Geus a ekstendé un invitashon na henter pueblo di Kòrsou pa uni den e inisiativa aki i pa tur dia di nobo tur hende hasi esfuerso pa nan ta un bon yu di Kòrsou. “Ta huntu so nos por realisá e nashon di Bon Yu di Kòrsou ku nos tur ta anhelá di krea, ku nos por ta orguyoso di ta parti di dje i gosa di su benefishinan ku, na final, ta resultado di nos propio esfuerso. Nos tur ta yu’i Kòrsou, i Kòrsou mester di nos. Kòrsou mester di é bon yu di Kòrsou manera abo”, señor de Geus a finalisá bisando.