Un recital musical historico, monumental y inolvidabel!

Dia 24 di December proximo, un anochi prome cu Pasco, bo ta invita pa disfruta di un regalo Navideño produci pa Telearuba y presenta pa Edjean Semeleer y su amigonan musical.

E interior di un di e monumentonan di mas bunita y impactante riba nos isla cu ta nos Stadhuis na Oranjestad, a wordo totalmente transforma pa asina fungi como anfitrion di un anochi historico, den cual nos artistanan local a presenta un concierto Navideño pa deleita henter nos pueblo.

Un orkesta fantastico bao direccion di Ivan Quandus a compaña no solamente Edjean Semeleer cu ta e protagonista principal, pero tambe e artistanan invita manera Jeanedy Semeleer, Pearl Dumfries, Susjaira Kerpens, Jonathan Croes, Randall “Zyon” Luidens y Kasey Dozier.

E team di TeleAruba, bao direccion di Francie Celaire, a traha cu cuerpo y alma pa planea, prepara y ehecuta un di e proyectonan mas impactante den henter nos planta nacional su historia. Esaki sigur ta demostra cu semper tin progreso y dinamismo ora cu pone talentonan y boluntad hunto.

E show special aki lo bira un di e produccionan di television mas impactante y stima pa hopi decada nos dilanti, mirando cu ta trata aki di un produccion local di un calidad y variacion fenomenal.

E idea tras di e prome tv special aki ta pa stimula union familiar, pero tambe pa sigui cu e tradicion di apoya y sostene nos propio talentonan musical.

Un gradicimento inmenso ta bay na cada un persona y compania cu a demostra apoyo y a aporta na e proyecto aki pa e por a bira un realidad y un exito.

TeleAruba, cu hopi orguyo ta invita bo pa sintonisa nos canal nacional, dianan 24, 25 y 26 di December, den union familiar, pa disfruta di “Un Pasco na Cas” cu Edjean Semeleer y su amigonan musical.