Krishna Doll–Oedjaghir, Joanne Nicastia i Jemyma Betrian
Miéntras ku e lista di oradornan pa TEDx Curaçao 2016 ta wòrdu formá, e organisashon ta anunsiá algun orador ku ya kaba a konfirmá nan presensia. Ku masha orguyo, TEDx Curaçao ta anunsiá e promé 3 oradornan pa TEDx Curaçao 2016: E promé orador ta Krishna Doll–Oedjaghir, Marketing & Sales Specialist na Curaçao Air Terminal Service (CATS). E ta un eksperto den marketing ku eksperensia den ‘sales, branding and strategic product placement’. Krishna a traha ku vários eksperto – for di Asia te ku Brazil. Tópiko di Krishna su ‘TEDTalk’ lo ta “The importance of accepting an innovation as Small Island Developing States (SIDS)”. E lo ta enfoká riba e ‘Bridging the Gap’ entre aseptashon di inovashon SIDS i e status aktual di nos pais riba e tópiko aki.
Otro orador ku a konfirmá ta Joanne Nicastia. Joanne tin mas ku 15 aña di eksperensia den ‘Strategic analysis and implementation’ i den ‘Risk analysis and arranging project financing’. Te ku resientemente e la okupá e posishon di Senior Director Transactions na National Investment Bank Curaçao. Joanne lo amplia riba su pèrspektiva; kon negligensia sosial por impaktá e desaroyo finansiero ekonómiko di un pais i desekilibrá e komunidat den diferente aspekto.
Tambe e organisashon di TEDx Curaçao ta anunsiá Jemyma Betrian. Un deportista disipliná i un tremendo Muay Thai Boxer. Den pasado e la entrená pa peleanan di Mixed Martial Arts (MMA) i kompetí den algun pelea di MMA na Los Angeles. Su soño ta pa un dia logra un titulo den Ultimate Fighting Championship (UFC). Jemyma ke enkurashá i inspirá hóbennan di Kòrsou durante di su ‘TEDTalk’. “Trahando duru bo por logra bo metanan i alkansá bo soñonan”. Jemyma semper ta prepará su mes pa metanan grandi ku ta su dilanti i ta biba ku e pensamentu “Success comes when preparation meets opportunity”.
Den e próksimo simannan, TEDx Curaçao lo anunsiá e siguiente grupo di oradornan ku a konfirmá nan presensia. Keda bishitá e página di Facebook www.facebook.com/TEDxCur òf e wèpsait www.tedxcuracao.com pa haña sá mas di TEDx Curaçao 2016 ku lo tuma lugar 12 di Mart 2016 na District 1850 den kolaborashon ku The Movies.