Cheraldine Osepa, Thomas de Windt, Matt Weinstein i Kelly James
Ya kaba den siman tras di lomba a anunsiá e promé grupo di oradornan ku tabata Krishna Doll–Oedjaghir, Joanne Nicastia i Jemyma Betrian, e siman aki ta anunsiá e di dos grupo di oradornan. E mishon ta pa buska hendenan ku tin ideanan ku ta balelapena kompartí, den espíritu di e tema di e aña aki “Bridging The Gap” e organisashon a filter algun orador ku por inspirá i ku ta representá e tema spesífiko aki. Kada orador su prestashon, testimonio i logronan profeshonal lo laga e partisipante di TEDx haña un perspektiva nobo i invoká emoshonnan fuerte.
TEDx ta orguyoso di anunsiá Cheraldine Osepa, un instruktor di yoga sertifiká ku tin su raisnan aki na Korsou. Na 2010 Cheraldine a bira direktor departamentu di Kultura i Deporte, tambe e’la kuminsá Ubuntu Wellness Center i te dia di awe ta praktiká e trabou aki na Delft, Hulanda. Cheraldine lo presentá hèrmèntnan ku e’la usa pa krea un brùg i yena un ‘bashí di paden’- e hèrmèntnan aki ta hasi posibel ku awendia e por disfrutá di fleksibilidat profeshonal i stabilidat personal.
Tambe ta anunsiá Thomas de Windt; Thomas ta diseñá aparatonan ortopédiko pa yuda hende funshoná despues di un inkapasidat físiko òf amputashon di un miembro di e sistema musculoesquelétiko òf pa koregí kresementu/ desaroyo di e sistema aki pa mucha. Thomas, lo elaborá riba un di e komplikashonnan di diabétis- amputashon di un pia i e posibilidatnan úniko ku tin na Kòrsou pa rápidamente restourá funshonamentu.
Matt Weinstein tambe lo ta un orador interesante den TEDx. Matt ta un konsùltent merikano spesialisá den ‘community and economic development’ i e revitalisashon di siudatnan post-industrial. E’la traha pa numeroso entidat den sektor públiko durante su karera. Matt lo ofresé un bista di un persona pafó di nos pais- esaki lo duna un otro perspektiva di e diferente desafionan ku ‘Pais Kòrsou’ ta enfrentá despues di 6 aña 10/10/10 i e pensamentunan kon di un manera representativo gobièrnu por yuda avansá igualdat sosial, mehorá kapasidat síviko i krea un sistema mas efektivo di gobernashon.
Otro orador ta, Kelly James; un eksperto i instruktor den benta i un konsùltent ku a traha den forma ekstenso ku kompanianan di Fortune 500 durante di henter su karera. Kelly, ta yuda hende tímido pasa riba nan miedo di ‘bende’ dor di siña nan sistemanan di ‘benta’ efisiente i krea strategianan pa nan relashonnan empresarial òf ku kliente. Den Kelly su ‘TEDTalk’ e lo ilustrá ku krea un brùg entre ‘ken nos ta’ i ken nos ta ‘soña di ta’ ta kuminsá ku un skohensia i ta sigui ku akshonnan simpel ku fásilmente nos por pone den práktika. Próksimamente TEDx Curaçao lo anunsiá e último grupo di oradornan ku a konfirmá nan presensia. Keda bishitá e página di Facebook www.facebook.com/TEDxCur òf e wèpsait www.tedxcuracao.com pa haña sá mas di TEDx Curaçao 2016 ku lo tuma lugá 12 di Mart próksimo na District 1850 den kolaborashon ku The Movies.