Despues di 5 aña TEDxCuraçao ta bèk ku un evento pa inspirá. E tópiko di e aña aki lo ta ‘Bridging the Gap’. TEDxCuraçao lo tuma lugá riba djasabra 12 di mart, 2016 na District 1850 den kolaborashon ku The Movies. E meta ta, pa trese tur esnan ku ta determiná i entusiasmá di por koutivá, inspirá i konektá huntu den un evento. Ekonomia, un komunidat multi-kultural i lasonan históriko ta e realidat ku diariamente ta yena nos ku pregunta i ta motivá nos pa bin ku solushonnan kreativo. Kon nos ta krea un brùg i yena e bashí? E organisashon a buska ideanan serka tantu personanan lokal i internashonal p’asina atraé un grupo di hende inspirá ku mente kurioso pa konektá riba ideanan inovativo.

Durante di e anochi lo tin seshonnan di ‘TEDTalks’ di 10 diferente orador, esaki pa un públiko limitá. E oradornan ta bin for di diferente área di trabou i konosementu, sea empresarial òf artístiko. Tur ta profeshonal riba nan tereno. Lo tin oportunidat pa ‘networking’ i na final un ‘after party’ pa tur ku tabata presente. Karchinan lo ta na benta pronto! ‘Like’ e paginá di facebook TEDxCuraçao p’asina bo ta promé pa haña sá unda pa atkerí bo entrada.

TEDxCuraçao ta wòrdu realisá dor di un tim di profeshonal dediká i ku di un manera boluntario ta organisá e evento den nòmber di tur e patrosinadónan. Pa mas informashon riba TEDxCuraçao i e pakete kon bo empresa tambe por forma parti di e evento dia 12 di Mart próksimo por bishitá e wèpsait www.tedxcuracao.com òf bishitá e paginá di Facebook www.facebook.com/TEDxCur.