TDS, nos kompania di televishon pagá, 2 bes pa aña ta hasi un mantenshon obligatorio riba e seguridat di kanalnan. Na Aprel nos a informá di e suseso aki i e biaha aki no ta un eksepshon i p’e motibu aki TDS ta partisipá na tur miembro di tantu Kòrsou komo Boneiru ku e di 2 mantenshon pa 2014 lo tuma lugá di 23 pa 30 di Òktober próksimo. Durante e mantenshon aki, TDS lo manda un señal pa tur bòks ku ta aktivo tantu na Kòrsou komo Boneiru. P’e motibu aki ta supliká tur kliente pa nan tin nan bòksnan sendé riba kualke kanal. E televishon si NO mester ta sendé, únikamente e bòks. Asina e bòks risibí e señal, e imágen lo bai for di aire entre 1 pa 2 ora p’asina e informashon ku ta den e señal por wòrdu inkorporá den e bòksnan. Despues di e tempu di entre 1 pa 2 ora, e bòks lo siguí funshoná normal atrobe. Ta di sumo importansha pa e bòks ta sendé durante di e periodo menshoná. Si esaki no ta e kaso, e bòks ku tabata pagá lo no por risibí señal mas despues di 30 di Òktober. Dor di e kantidat grandi di bòks ku tin na Kòrsou i Boneiru, no por informá ku eksaktitut ki dia òf ki ora e bòks di kada kliente lo risibí e señal i p‘e motibu aki TDS ta informá e periodo ku esaki lo pasa, esta 23 pa 30 di Òktober binidero. For di awor TDS ta pidi su diskulpa pa kualke inkonbeniensia ku e mantenshon aki por trese kuné i alabes kier avisá tur kliente ku si despues di 2 ora e bòks no siguí traha, tuma kontakto inmediatamente ku 9242 pa mèldu esaki na HELPDESK. 9242 ta un number GRATIS pa tur kliente di CHIPPIE i Telefòn Fiho di UTS. TDS ta siguí perkurá pa informá su klientenan debidamente, p’asina brinda aun mas i mihó servisio.