WILLEMSTAD – TAYA, un plataforma di ‘streaming’ nobo ta lansa. E plataforma aki ta reuní pelíkulanan di nos isla na un lugá. Ku pelíkula nan den kategoria nan manera pelíkula kòrtiku, fikshon, dokumental i pelíkulanan klásiko, TAYA ta kla pa públiko di nos islanan i rònt mundu disfrutá di loke ta di nos.

Riba TAYA tin klásiko nan manera Ava & Gabriel te pelíkula nan mas resien manera Yamada. E struktura di e plataforma por ser konsiderá komo un videoteka online. Esaki ya komo ku e públiko por skohe e pelíkula ku nan ke wak, kumpra òf hür. Nos tin sigur ku e amantenan di sine rònt mundu poko poko ta bin wak i eksplorá e kolekshon di sinenan di nos mes.

E struktura ariba menshona ta hasi posibel tambe ku por ehèmpel famianan, organisashonnan i hasta skolnan fásilmente por yega na e kontenido ku nan ke wak pa kualke okashon.

TAYA a nanse di un konstatashon ku hopi pelíkula di nos islanan despues di nan estreno no ta aksesibel niun kaminda mas. Na vários okashon inisiadó di e plataforma produktor Sulin S. F. Passial a keda aserká pa wak kon ta yega na pelíkulanan di nos. Sea ku ta algu ku el a traha riba dje òf no. Esaki tabata parti di e inspirashon pa start TAYA. Ademas den kombersashon ku diferente siniastra e a konstatá ku tin tera fértil pa algu asin’aki di parti di e siniasta nan tambe. Di einan a kuminsá ku e proseso pa krea e loke awe ta TAYA.

Manera indiká anteriormente e plataforma digital aki ta inisiativa di produktor Sulin S.F. Passial. Komo doño di Pantalla Chica Productions i miembro aktivo di e mundu di sine di Kòrsou, el a disidí di kuminsá TAYA. Sigun Sulin “TAYA ta un kolaborashon entre mi kolega nan den mundu di sine mas ku tur kos. Mi por a inisiá esaki, pero sin nan konfiansa i kolaborashon TAYA lo no tabata posibel”. Banda di e grupo di siniastanan ku a pone nan pelíkulanan disponibel, e proyekto aki ta keda hasí posibel ku entre otro koperashon di Prins Bernhard Cultuurfonds Caribisch Gebied.

TAYA ta aksesibel for di awor via di taya.tv. Pues públiko rònt mundu ta invitá pa subi i kumpra òf hür nan pelíkulanan lokal i disfrutá di e talento di loke nos mes hende nan por. E proseso pa hasi esaki ta masha fásil: 1. Subi riba taya.tv 2. Skohe e pelíkula di bo smak. 3. Klik riba get access now. 4. Sigui e stapnan 5. Disfrutá di bo pelíkula. Riba TAYA tin na e momentu aki 15 pelíkula i e katálogo ta sigui krese. Pues pa keda informá di tur detaye Sigui nos na @tayabypac riba facebook i Instagram.