E “Kandela di Lucha” ta kontinuá  na Museo Tula ku kanto di libertat di Grupo Trinchera i deklamashon di Quenton Brunken. Djasabra 9 di ougùstùs a tene un seremonia di purifikashon na Museo Tula. A usa e vlam di libertat pa sende un kandela di lucha.  Un kandela ku por kima tur opstákulo ku ta stroba nos pueblo kulminá e proseso di emansipashon i forma un komunidat demokrátiko. Un komunidat ku hende emansipá ku ta respetá tur aspekto di su historia i kultura i den kua ta kultivá balornan demokrátiko. Tur presente na e “Kandela di Lucha” djasabra último, a nota kiko nan ke kima riba un papel i a tira esaki den e kandela komo akto di purifikashon. E grupo musikal “Sablika” a animá e presentenan ku kanto i a baila lanta e kandela di lucha i kurashi.  A para ketu tambe na balornan ku tin ku reskatá pa logra un komunidat ku ta balorá balornan manera rèspèt pa otro ser humano i konvivensia ku otro. Ta e balornan aki a lucha p’e  durante e Gran Rebelion di 1795 ku Tula komo lider. E kousa prinsipal di e lucha di 1795 tabata e anhelo persistente pa libertat ku tabata biba den kurason di tur esnan sklabisá, for di momentu ku a kue nan prezu na Afrika.  Un anhelo asina profundo ku nan tabata dispuesto na duna nan bida p’e kousa di libertat. E kandela di lucha ku a inspirá e Gran Rebelion di 1795, ta e filosofia ku tabata base di e revolushon franses di 1789  ku a promové  e idea di libertat, igualdat i fraternidat pa tur hende. Djadumingu awor, 17 di ougùstùs, ta 219 aña pasá ku  e gran rebelion di katibu bou di liderato di Tula i su kompañeronan a tuma lugá na Kòrsou. Ta e fecha ku Gobièrnu di Kòrsou na 1984 a proklamá ofisialmente komo “Dia di lucha pa libertat”. E aña aki atrobe Asosiashon Promoshon Konsenshi Istóriko i Plataforma Sklabitut i Herensia di Sklabitut, ta organisá un grandioso konmemorashon na Parke Lucha pa Libertat na Ref: djadumingu 17 di ougùstùs for di 7 or’ pa 10 or’ di anochi. Museo Tula, den su tarea di formashon i edukashon lo tene un antesala ku tambú di Grupo Trinchera i deklamashon di Quenton Brunken. Di e manera aki Museo Tula ta traha na kontinuo promoshon i konsientisashon tokante historia di Kòrsou. Pueblo en general ta invitá na e antesala “Kanto pa Libertat” ku ta tuma lugá for di 2’or te 4’or na Lanthuis Kenepa.  Entrada pa e aktividat ta grátis. Pa guia den museo lo tin preis spesial di Fl.5,- pa persona i Fl. 3,- pa grupo di 10 persona òf mas. Mucha te 12 aña por bishita e museo grátis. Museo Tula ta invitá tur hende pa bin tende, mira i sinti historia di Kòrsou. Pa anochi por konmemorá “Dia di lucha pa Libertat” ku konosementu berdadero di nos historia!