Willemstad, Despues di 25 presentashon rònt Hulanda, Tambú a Freedom Song a bin Kòrsou bek, pa finalisá su gira di presentashonnan dia 15, 16 i 17 di desèmber 8or di anochi na La Tentashon. Tambú a Freedom Song ta un obra traha pa Volksoperahuis un grupo di Hulanda. Jef Hofmeister i Kees Scholten ku a bishita nos isla for di aña 2010 i a traha e obra Morto i Laman “ De Vliegende Hollander”. Durante di nan bishita na Korsou nan a keda impreshoná pa Kòrsou i prinsipalmente Òmpi Tio i su Tambú. Ompi Tio a konta vários historia i anékdota di Tambú. Esei a lanta nan interes pa bin bek Kòrsou i traha un obra tokante di Tambú. Òmpi Tio a splika ku Tambú ta e bari di e katibunan, e baile i e músika. Tambú a Freedom Song ta konta e historia di Jhonny i Lorenzo dos ruman kompletamente diferente. Lorenzo i Johnny Martina ta topa despues di basta aña den e entiero di nan tata. E tata a laga un tambú sagrado komo herensha. Lorenzo a krese na Hulanda e ta un deportista i su soño ta pa bai weganan olímpiko, ke men e no tin mester di niun tambú pa e bai kompetí. Ayabanda Johnny a pèrdè trabou i su kasa a bai lag’é i pa kolmo su tata a laga yen debe atras, e ta disidí di bende e tambú na un museo moda ku e por paga tur debe. Despues ku esaki sosodé kosnan ta kuminsá kana robes den Johnny i Lorenzo su bida. E ta un obra den dos idioma, hulandes i papiamentu. E aktuashon ta na enkargo di Albert Schoobaar i Kees Scholten. Jef Hofmeister huntu ku Ompi Tio, Pierre Dunker i Konkei Halmeyer ta enkargá ku e parti di e músika huntu ku ganadónan di Luna Yen 2013 Chosen Stars. E kos ta bai sinta ora ku Doña Elia Isenia bin kanta e 3 Tambú ke mes a komponé pa e obra aki. E úniko funshon nan ku ta bai tin ta dia 15, 16 i 17 di desèmber. 8or di anochi pa Nafl. 27.50 na La Tentashon. Karchinan ta na benta na takia di Teatro Luna Blou. Pa mas informashon por yama 4622209. Bo por chèk nos página nan wèp. www.lunablou.com òf  www.latentashon.com. Tambe bo por sigui nos riba facebook: teatro luna blou i la tentashon.