Vienna, Austria – E kantante kurasoleño Tamara Nivillac a subi red carpet na Vienna huntu ku delegashon di Azerbaijan pa e seremonia inougural di Eurovision Song Contest 2015 ku a tuma luga riba djadumingu 17 di mei. Eurovision Song Contest ta un kompetensia di kanto di kual mas ku 40 pais den Eropa ta tuma parti di dje. E semi final i final ta wòrdú transmití live na televishon rònt Eropa i tin un sintonia di mas ku 180 miyon espektador. E aña aki Eurovision Song Contest ta selebrá su di 60 aniversario i ta reafirmá su posishon komo un di e programanan di televishon ku mas aña di eksistensia na mundu. E grupo di Suesia, ABBA ta un di e ganadónan mas popular i eksitoso den historia di Eurovision Song Contest. Tamara a wòrdú remarká i aserká pa e delegashon di Azerbaijan via di medionan sosial dor di su bos “soulful” i a aseptá e reto pa tuma parti  na e kompetensia aki komo vokalista huntu ku dos vokalista di Suisia i Merka. Nan lo duna respaldo vokal na e kantante prinsipal pa e delegashon aki ku ta Elnur Huseynov ku lo interpretá e kansion “Hour of Wolf”.  Elnur Husernov no ta deskonosí den e mundu musikal, e ta ganadó di “The Voice 2015” na Turkia. Despues di ensayonan intenso na Suesia huntu ku stilista, makijadó, bailadónan, instruktor vokal, vokalistanan i demas miembronan di e delegashon, Tamara ta na Vienna aktualmente pa e lastu preparashonan i ahustenan pa e shownan ku lo tuma luga riba 21 i 23 di mei. Pa mas informashon chèk www.eurovision.tv òf sigui Tamara via di www.facebook.com/TamaraNivillac