E ta e di dos barku di bela di 4 mast mas grandi di mundu!

E barku di treinen di marina Chileno “BE Esmeralda” ta bishitá Korsou atrobe. Ta trata di e di dos barku di bela di 4 mast mas grandi di mundu, ku ta ser komandá pa e Kapitan di Navío Juan Andrés De la Maza Larraín (49 aña), ku 335 persona na bordo, di kua 113 ta guardiamarinas (kadete den treinen) i 34 ofishal femenino. E “Buque Escuela Esmeralda” lo drenta haf dia 23 di desèmber i e lo keda Kòrsou te 29 di desèmber próksimo. Naturalmente durante su bishita tin amplio oportunidat pa pueblo di Kòrsou i prinsipalmente nos hóbennan bishitá e mahestuoso barku aki. Nos lo risibi’é ku muzik tokando nan himno di Marina i nan Himno Nashonal segun e ta drentando bahia di Santa Anna. Despues ku e barku mara den haf, e Komandante lo hasi e bishitanan protokolar serka nos Gobernador i otro outoridatnan konserní. Komandante Juan Andrés De la Maza Larraín ta invitá miembronan di komunikashon pa dia 23 di desèmber atardi 16:30’or pa duna nan un splikashon tokante di e biahe aki – i pa ki motibu e ta bolbe bin Kòrsou – i tambe pa kontestá tur pregunta. E barku a sali dia 22 di septèmber for di Valparaiso (Chile) pa su biahe di instrukshon number 58, ku lo dura kasi 1 aña, bishitando 25 diferente pais. Pa medio di esaki, Curaçao Sail Foundation ke duna tur e ofishalnan komo e marinonan di e barku un bon biní i deseá nan un felis estadia riba nos isla. Alabes  Curaçao Sail Foundation ke invitá henter pueblo di Kòrsou pa bin sera konosí ku e bunita barku di treinen di Chile, ku sigur ta bale la pena un bishita. Oranan di bishita Pa mas informashon tokante e orario di bishita pa públiko i e waf kaminda e lo mara durante su bishita, nos lo saka un di dos boletin ora e dia di su bishita ta más serka.