Un tim di Kòrsou a partisipá na un di e eventonan mas grandi na mundu pa timnan di ahedrés. Tantu e tim femenino komo esun maskulino tabatin resultadonan positivo. Apesar di e hecho ku den ahedrés no ta hasi distinshon entre hungadónan di ahedrés komo trabou (beroeps schakers) i esnan amatùr. Na e di 41 Olimpiada aki di ahedrés kasi 1800 hungadó di ahedrés di 174 pais a partispá. Tabatin algun partido ku a dura kasi 6 ora largu. E eksperto nashonal Jimmy Izijk a logra den e di 7 buèlta su título Candidate Master i e kampeon di Kòrsou, Wim Bijlstra a logra den e di 10 buèlta su título FIDE Master. Den e grupo di dama, Ailen Mena a logra durante e di 6 buèlta su título Women Candidate Master i den di 11 i último buèlta a logra tambe su título Women FIDE Master. Ademas, Ailen Mena a logra di un grupo di 673 partisipante, pa yega den e top 100 ku mihó puntuashon, mihó porsentahe i mas punto di kategorisashon elo. E éksito di Ailen Mena ta pa nos hobennan lokal e muestra ku kombinashon korekto di dedikashon i displina bo ta logra e meta deseá. FEDAKO (Federashon di Ahedrés Korsou) ta sumamente agradesido na Maduro & Curiel’s Bank, ku a kontribuí komo spònser prinsipal pa nan partisipashon na e olimpiada aki.