Fondonan pa Stichting BOB y Imeldahof

ORANJESTAD – JAN– Den luna di december ultimo Renaissance Marketplace a ofrece Aruba un experencia unico cu e Ice Skating Rink. Ademas, grandi y chikito a disfruta inmensamente durante e dianan di fiesta, di entretenimento bibo di e.o Las Unicas, Grupo di Betico, Tsunami, Le Groove, ‘N Fuzion, Claudius Philips & OREO y por a conclui cu Aruba a gosa di e nochinan di compra den luna di december na Renaissance Marketplace.

Aunke cu tabata dianan di celebracion, tanto e Ice Skating Rink y tambe e benta di regalo tabata tin un proposito masha special. Tur loke a wordo genera for di e.o huur di sapato na e Ice Skating Rink a bay pa Stichting BOB y tur loke a wordo genera for di e ‘Christmas Gift’ a bay pa Imeldahof. Di e manera aki Renaissance Aruba Resort y tambe Marketplace a bolbe subraya nan compromiso cu e comunidad di Aruba y a conscientisa clientenan riba esencia di Pasco; comparti cu otro y duna un man na unda esaki ta necesario.

Renaissance Aruba ta contento cu Imeldahof a join e Winter Wonderland pa nan recaudacion di fondo y ta felicita nan cu un exitoso resultado. E mercado di artesania a bende tur tipo di arte elabora pa artistanan local. Ta aplaudi artistanan cu a participa; un danki special na Elisa Lejuez, Elvis Tromp, Edmond Tujeehut, Frank Croes, Armando Goedgedrag, Glenda Heyliger, Stanley Kuiperi y tur hoben y adulto di Fundacion Siñami Paso pa Paso Aruba. E fundacion ta traha arte for di material recicla y ta keda elabora na man pa hoben y adulto cu desabilidad fisico di entre 5 pa 96 aña di edad.  Un gradicimento special na Vivian Marques, Flora Market y Superfood pa nan contribucion valioso.

A recauda 17,500 florin total

Renaissance Aruba ta gradici henter comunidad! Danki na generosidad di tur cliente por a yuda ambos fundacion recauda fondo. Stichting BOB a recauda AWG 7,500 na e Ice Skating Rink di Renaissance Marketplace y Imeldahof a recauda AWG 10,000 cu nan mercado di artesania! Mientras cu Stichting BOB lo tin bon uzo pa e fondonan den nan trabou di conscientisacion riba cancer na pecho, Imeldahof ta entusiasma pa cuminsa e remodelacion di nan ‘snoezelkamer’ pa muchanan di entre 6 cu 16 aña di edad. Tur esfuerso hunto ta demostra con nos por comparti cu otro na Aruba y haciendo esaki subraya esencia real di Pasco.