Diaranson mainta pa 11or y 11 minuut a zona e jingle oficial di Carnaval 62. Un tradicion cu di e forma aki e temporada y celebracion nacional di mas grandi di nos isla ta ranca sali. Despues di un transicion aña pasa e organisadonan di Carnaval SMAC, den un periodo hopi cortico a pone un Carnaval riba pia, despues di un aña sumamente exitoso cu tabata Carnaval 60. Manera ta conoci e ta un reto pa net despues di un lustro grandi logra esaki. Sinembargo nos por wak atras riba un Carnaval 61 exitoso cu a conta cu sosten di gruponan di Carnaval, bandanan y comerciantenan cu a contribui. Minister Otmar Oduber como mandatario di Cultura a gradici SMAC y tur esnan envolvi. E la comenta cu ta pa prome biaha a logra haci disponibel un relato financiero cu tabata un di e preocupacionnan grandi y un di e condicionnan cu a wordo poni dilanti pa SMAC. Sr. Oduber ta bisa: “Mi kier a felicita e presidente di SMAC, Sr. Randy Thiel pa a cumpli manera ta prescribi den e statuut cu den un forma habri, comunidad di Aruba, tur carnavalista y comerciantenan por haya ainda mas confiansa den sostene e actividad economico di mas grandi cu tin den henter aña, cu ta Carnaval.”

Carnaval 62 lo ta un periodo cortico di apenas 5 siman cu sigur nos comercio lo por disfruta di dje. E mandatario ta continua: “Cu esaki mi ta haci un apelacion tambe na comercio pa duna sosten no solamente na e organisacion di Carnaval SMAC, pero sigur na cada un di e gruponan di Carnaval cu ta participa, como tambe musiconan, banda y tur cu ta forma parti di e festividad cultural grandi aki.” Despues cu e tononan oficial di e jingle pa Carnaval 62 resona, preparacionnan ta inicia pa un temporada di Carnaval hopi cortico. Dia 2 di januari tin fakkel optocht cu ta habri e programa. Sr. Oduber ta bisa: “Como Minister encarga cu Cultura, mi por bisa cu sigur nos ta bay tin 2 celebracion hopi importante den nos cultura pega na otro. Nos lo celebra y baila Dande deseando otro un bon aña nobo, mientras cu mesora musica di Carnaval ta cuminsa resona. E ta un momento unico unda Carnaval ta hopi tempran e aña aki, cu un schedule hopi yen y preta.”

Minister Oduber a probecha e ocasion pa gradici tambe e cooperacion cu a nota entre SMAC y tur e stakeholders nan, e diferente institutonan, e departamentonan di gobierno y tambe esnan priva cu a reuni tempran y den un bon ambiente, pa por sigura un periodo cu ta bay ta hopi cortico, pero asina mes ta premira cu lo bira uno sumamente exitoso.

Minister ta finalisa bisando: “Ta mi deseo y mi ta sigur, cu dialogo entre diferente organisacionnan cu ta participa den Carnaval ta bay contribui na hopi positivismo den e Carnaval 62. Ta importante pa tin dialogonan habri pa nos tin un periodo cortico pero sumamente positivo. ta mi deseo pa programanan di radio y television trece e mensahenan positivo pa nos gruponan y pa transmiti esaki pa nos comunidad, cu na final di cuenta nos por celebra dia 8 di februari atrobe un otro Carnaval sumamente exitoso, cu hopi alegria y cu hopi amor. Pabien SMAC, pabien na e gruponan di Carnaval, bandanan, musiconan, comercio en general cu ta forma parti di e actividad cultural di mas grandi cu ta tuma luga riba nos isla. Biba Carnaval, biba Aruba y biba tur esunnan cu ta forma parti di e celebracion grandi aki.”