Hinter komunidat ta invitá pa partisipá riba 20 i 21 di mart

WILLEMSTAD— E di dos edishon di CURA DOET, e akshon boluntario nashonal di Kòrsou, ta pinta di bira algu grandi atrobe. Diferente organisashon sosial, inkluyendo organisashonan di bario, di skout, di deporte, di grandinan i hopi skol rònt Kòrsou a inskribí en total 180 tarea òf aktividat riba www.curadoet.com i awor ta buskando hopi boluntario pa djòin nan durante CURA DOET dia 20 i 21 di mart 2015. Aña pasa a organisá CURA DOET pa promé biaha i 2600 hende a partisipá pa kumpli ku 132 tarea i aktividat. Un total di 32 kompania, grandi i chikí a sali drenta bario ku nan empleadonan i a partisipá ku hopi satisfakshon. CURA DOET ta duna hobenan tambe un chèns pa konosé organisashonan i kausanan sosial. Durante CURA DOET, organisashonan i boluntarionan ta uni forsa, p’esei e lema di CURA DOET ta ‘Dun’un man, gan’un kurason’. E dos dianan ta un okashon úniko kaminda diferente hende di tur edat por bin huntu — koleganan, amigunan, kompañeronan di deporte i famianan— pa nifiká algu pa otro i pa komunidat. Boluntarionan por mira tur e tareanan i aktividatnan riba www.curadoet.com  i por inskribí komo individual òf grupo. Ricardustehuis entre otro ta buska boluntario pa yuda drecha nan ‘boerderij’ ya nan grandinan por sigi disfruta di kuido di bestia. 22 skol, entre otro Kolegio Sur Herman Joseph, De Springplank i  Kolegio Santa Clara i hopi mas lo pinta i dekora nan klasnan, nan terenonan di hunga i murayanan ya nos muchanan ta siña ku mas plaser i entusiasmo den un ambiente kolorido i alegre. Fundashon Verriet tambe ta buska man pa yuda ku un hardin di enkuentro ku nan kier krea pa nan klientenan. CURA DOET ta ser organisá dor di Curaçao Cares i ‘Het Oranjefonds’ i ta forma huntu ku BON DOET, ARUBA DOET, NLdoet i pa promé biaha e aña aki SXM DOET i STATIA DOET, e akshon boluntario di mas grandi di reino i Karibe. Pa inskribí komo boluntario por bishitá www.curadoet.com. Pa mas informashon tambe lo por email curadoet@curacaocares.org