Den kuadro di e di 15 Ride, Swim & Walk for the Roses

WILLEMSTAD – For di awe por spera un aglomerashon grandi di hende bou di e tèntnan den kurá di Orco Bank na Schottegatweg Oost. Esei ya tradishonalmente ta e sitio kaminda for di djaluna dia 21 te i ku 26 di yanüari ainda por inskribí i tambe por buska flanèl i efektivamente por paga pa partisipashon na e Walk, Ride i Swim for the Roses di djadumingu awor.

Ya tabata posibel pa inskribí online, pero pago online si no ta faktibel ainda. P’esei e siman aki tòg mester pasa un ratu tòg na e voluntarionan na Orco Bank. Fabor bini ku un print-out si akaso a inskribí online, sea riba papel òf riba smart phone, komo prueba. Na e sitio mes tambe por inskribí pa Ride i Walk for the Roses. Tin formulario di inskripshon poné kla riba e mesanan den kurá. Pa e Swim si ta obligá pa inskribí online. Seguidamente por paga mesora na e sitio mes pa e partisipashon; preferiblemente dor di swipe i ménos posibel ku plaka na efektivo.

E proseso di inskripshon i pago na Orco Bank ta tuma lugá di djaluna 21 di yanüari te i ku djabièrnè 25 di yanüari entre mitar di 9 mainta te mitar di 4 atardi, ku un oportunidat adishonal riba djasabra 26 di yanüari for di 9 or di mainta te 4 or di atardi.

4 tipo di flanèl

Partisipashon na e aktividatnan ta brinda derecho riba un flanèl blanku, pero tambe un refresko i un pida fruta na final. Na e banko por apliká tambe pa otro koló di flanèl, manera kòrá pa esnan ku a sobrebibí di kanser, esun hel pa esnan ku ta den lucha ainda kontra e malesa kanser i esun pretu pa konmemorá esnan ku no a gana e bataya ku kanser.

Na Orco Bank tambe tin e posibilidat atrobe pa kumpra otro merchandise, manera tas, pèchi, flanèl spesial, etc.; tur pa e bon kousa: generá fondo pa PWF ku na diferente forma ta asistí klientenan ku kanser i nan famia.