Hopi potensial susesor di empresanan di famia no ta regresá Kòrsou despues di nan estudio den eksterior. Tumando na kuenta e tamaño moderá di nos isla, ta hopi difísil òf den sierto kaso hasta imposibel, pa logra haña un alternativo adekuá pafó di famia. Asina BDO i Maduro & Curiel’s Bank (MCB) ta afirmá den e investigashon titulá Familiebedrijven op Curaçao, Opvolging naar de volgende generatie ku nan a laga a hasi. E siman aki a presentá e resultadonan di e investigashon aki durante e Seminario Empresanan di Famia di BDO/MCB.

Empresanan na Kòrsou tin desafio grandi

Anne-Claire Nap, un studiante di Windesheim University of Applied Sciences na Hulanda, riba enkargo di BDO i MCB i bou di supervishon di Windesheim a investigá empresanan di famia na Kòrsou, spesífikamente e problemanan ku nan ta topa ora ta buska suseshon. Pa un kantidat grandi di empresario for di e grupo di enfoke spesialmente e falta di susesor den famia ta resultá un problema ku parse kasi insuperabel. No ta fásil tampoko pa atraé un gerente baké eksterno. Si tuma na kuenta tambe e konfiansa ku mester tin den e kapasidatnan di posibel susesor i e kuido pa bienestar di e mayornan, ta surgi e pregunta si futuro di sierto empresa di famia na Kòrsou no ta kore peliger. No mester supestimá e interes ekonómiko di empresanan di famia na Kòrsou, pasobra e grupo spesífiko aki ta kontribuí supstansialmente na empleo i e produkto nashonal. “Ku bista riba e interes ekonómiko di empresanan di famianan na Kòrsou, mester paga atenshon urgentemente na e problemátika ku ta sali for di e investigashon”, segun Gerd Glaudemans di BDO. “Komo akountent i business coach ku un trayektoria largu di dos dékada riba tereno di konseho na empresanan di famia, nos, huntu ku nos partner den e investigashon Maduro & Curiel’s Bank, lo dediká atenshon na esaki den e tempu binidero”.

Suseshon dentro di famia no ta fásil

Suseshon dentro di e empresa di famia ta un asuntu esensialmente diferente for di otro empresa ku no ta pertenesé na famia. E proseso den mayoria kaso ta mas kompliká i hopi be ta dura mas largu. Ta trata di traspaso di mando, propiedat i outoridat dentro di famia. Den esei konfiansa ta mas importante komo elemento delikado ku ta eksigí hopi tempu. E papel dòbel di esnan envolví den e proseso, kaminda algun di nan tin tambe un laso familiar emoshonal ku otro, ta perkurá pa posibel tenshon i konflikto, loke famianan hustamente ke evitá. Pa motibu ku nan no konosé prosesonan asina den hopi kaso ta pusha e problemátika di suseshon mas patras. “Ora finalmente nan no por bira rònt e problemátika di suseshon mas i mester tuma desishon, hopi biaha ta surgi problema grandi ku lo por a evitá relativamente fásil si a plania na tempu i ku guia profeshonal”, segun Lilian Nicolaas-Eleonora, direktor di BDO.

Konsiensia i rekonosementu

For di hopi otro investigashon di rònt mundu ta resultá ku empresanan di famia ta hunga un papel importante den ekonomia. Ku un filosofia spesial ku ta skonde tras di hasi negoshi, basá riba término largu, durabilidat i independensia finansiero, e empresanan aki ta distinguí mas i mas di empresanan ku ta registrá na  bolsa, kaminda ganashi i bónus ta pisa hopi mas tantu. Na Kòrsou tambe e konsiensia di esaki ta krese mas i mas. Manera ta e kaso na hopi otro pais na mundu, gobièrnu i mayoria profeshonal ku ta duna servisio na komèrsio no ta rekonosé e forsa di empresanan di famia sufisientemente. No únikamente esaki ta un inhustisia, pero nan no ta para ketu tampoko na e nesesidatnan di e grupo aki di enfoke.

Nesesidat eksplísito

Por ehèmpel, e investigashon ta mustra ku e empresarionan aki tin nesesidat di struktura i klaridat pa loke ta suseshon. Den hopi kaso ta deseabel pa hasi kaso di preguntanan klave sensibel, manera si e susesor(nan) ta apto pa e tarea. Pero tambe e laso di e siguiente generashon ku e empresa ta un tema ku ta lòs hopi pregunta, miéntras ku e opshonnan pa reklutashon di dirigentenan kapabel eksterno ta limitá.

Mas di e seminario i e investigashon

E siman aki e Grupo di Konseho Empresanan di Famia di BDO i Maduro & Curiel’s Bank a tene un seminario pa empresanan di famia ku tabata bon bishitá, e aña aki rondó di e tema di ‘Empresanan di Famia na Kòrsou – Suseshon pa e siguiente generashon’. Bou di guia di e eksperto Ed van de Vijver di BDO a diskutí diferente tema i a presentá e relato di e investigashon. E relato aki ta kontené e resultadonan di e investigashon ku a deskribí ariba. Por pidi kopia di e relato aki atraves di Rachel René, rene@bdo.cw.