Diana Ross ta konfirmá pa Curaçao North Sea Jazz Festival! Nos ta sumamente honrá ku binida di e kantante di Soul i e íkono espektakular akí. Diana Ross su karera gigantesko i eksitoso a kondusié na kantidat di kondekorashon, premionan importante i hechonan memorabel den historia musikal internashonal. E ta ún di e muhénan prominente di historia musikal popular. Su éksitonan internashonal a keda rekonosé dor di e prestigioso Kennedy Center Honors na Washington DC pa e motibunan ei tambe sinku aña pasá. Aya a pone su karera profeshonal den lus mahestuoso i su musikalidat, su aporte na pelíkula, televishon i teater a keda grandemente honrá. Igualmente tabata e kaso pa su influensia riba kultura merikano i su trabounan boluntario. Guinness Book of Records a koroná Diana Ross ku un asina yamá Lifetime Achievement Award (Galardon di Logro pa Bida largu) pa “Most Succesful Female Vocalist of all Time” (Bos femenino mas eksitoso di Tur Tempu). El a kuminsá den añanan 60 komo kantante prinsipal di e grupo mundialmente famoso The Supremes. Ku esei e grupo a alkansá un prestashon sin igual i sin presedente di 12 hit number 1 na Merka. Ku esei tambe The Supremes ketu bai ta e grupo merikano mas eksitoso den historia. Komo solista Diana Ross a logra no ménos ku seis puesto number 1. Diana Ross su repertorio ta enserá: R & B, soul, pop, disco i jazz. Algun di su hitnan mundial ta: “Stop! In The Name of Love “,” Where Did Our Love Go ” I ” You Keep Me Hangin”.
Den mas ku kuarenta aña el a logra pone desenas di hit riba su nòmber i el a saka kasi kuarenta álbum. For di e obranan amplio akí Diana Ross lo saka fin di ougùstùs e piesanan pa su presentashon legendario na Kòrsou. Ademas di esei tin un konsierto dia 28 di ougùstus di Al Di Meola konfirmá na Brakkeput Meimei. Al Di Meola ta un gitarista merikano di jazzfusion i di latin jazz, ademas e ta kompositor i produktor. Aparte di un karera musikal di mas ku tres dékada e ta ser konsiderá komo un di e gitaristanan mas influyente den jazz te na e momentonan akí. Aña pasá el a saka un álbum ku e título Live At The North Sea Jazz Festival.
Nos ta spera di anunsiá pronto e último akto, i e aktuashon estelar di djasabra 31 di ougùstùs 2013.
CURAÇAO NORTH SEA JAZZ FESTIVAL 2013
Djabièrnè 30 di ougùstùs 2013:
Sam Cooke podium: Toto – Diana Ross – Marc Anthony
Celia podium: Gladys Knight – Sonny Rollins – Oumou Sangaré
Sir Duke podium: New Cool Collective – Raphael Saadiq –Erykah Badu
Etta James podium: Kris Berry – Mud Morganfield – Sabrina Starke
I presentashon di Hot 8 Brass Band
Djasabra 31 di ougùstùs 2013:
Sam Cooke podium: Luis Miguel – TBC
Celia podium: Paul Anka – Edmar Castaneda – Christian McBride Big Band
Sir Duke podium: Esperanza Spalding Radio Music Society – Los Lobos – The Roots
Etta James podium: Pernell Saturnino and Friends featuring Miguel Zenón– Sherry Dyanne – Kizzy McHugh
I presentashon di Hot 8 Brass Band
Durante siman:
Brionplein djadumingu 25 di ougùstùs – KONSIERTO GRÁTIS di: Israel & New Breed
Brionplein djaluna 26 di ougùstùs – KONSIERTO GRÁTIS di: El Gran Combo de Puerto Rico
Brakkeput Meimei djárason 28 di ougùstùs – Al Di Meola
Brakkeput Meimei djaweps 29 di ougùstùs: José James
Karchi pa festival ta na benta via 522-JAZZ, na e puntonan di benta konosí i via www.ticketmaster.com.
Curaçao North Sea Jazz Festival ta patrosiná pa: Fundashon Bon Intenshon