Aruba durante un aña y mei a keda warda pa por baila, diverti y lubida di tur problema. E ora cero a yega, e noticia a bira oficial! Despues di algun luna di preparacion y organisacion, awe Piar Productions, bou di direccion di Raul Piar, ta anuncia lansamento oficial di e banda musical SUONA.

SUONA, cual ta nifica: It Sounds! ta consisti di 6 integrante. 6 persona cu ta cla pa entrega nan talento na henter un comunidad unda vocalisacion, musica y ritmo lo sali manera un terapia pa cada ser humano cu lo probecha di e musica cu nan lo transimiti, manera nan medicina personal. Un vibracion diferente cu lo pone bo lanta y baila, un energia positivo cu lo kita tur malestar. E personanan aki no ta desconoci den mundo di farandula y musica. Chendell Beaumont, Arianne Westerburger y Jerwin Hernandez lo ta e cara y voznan den front y e parti musical ta na encargo di Adair Kelly, Urvin Danker y Raul Piar (director musical).

Sin laga afo e profesionalnan cu semper tin un tremendo zonido cu lo carga e banda cu ta High Performance Aruba. E constelacion di musiconan aki lo ta na encargo di bo entretenimento y asina duna bo nan musica fresco, inovativo y laga bo gosa di musica riba nivel di un banda grandi. SUONA a prepara un repertorio super varia y cu cancionnan den diferente genero, cla pa duna bon ambiente na tur bailado. Keda pendiente! Si bo
kier conoce mas di SUONA nos ta invita bo pa subi nos pagina di Facebook y Instagram desde diabierna 16 di Juli. Den e proximo dianan nos lo duna mas informacion di e salida oficial pa publico di SUONA, cu lo tuma luga den e prome siman di Augustus.