Pèrmit pa evento lo no keda otorgá… ‘Taste of Music’ posponé pa aprel 2018

WILLEMSTAD.- E organisashon di evento SUMUSICA ta anunsiá ku e evento ‘Taste of Music’ a keda posponé pa aprel 2018. Motibu di esaki ta ku e organisashon a risibí notifikashon verbal di Departamento di Pèrmit di Kuerpo Polisial ku ounke den promé instante lo a otorgá e pèrmit, pero debí na un fayo esaki lo no wòrdu otorgá mas. SUMUSICA den luna di òktober 2017 a hasi petishon ofisial pa presentashon di e artista internashonal, Ilan Chester durante di ‘Taste of Music’. E petishon a keda entrega na Departamento di Pèrmit di Kuerpo Polisial Kòrsou kaminda ela keda prosesá. Den luna di novèmber 2017, a entrega e representante di SUMUSICA e dokumentonan pa bai hasi pago na ofisina di Impuesto di entre otro Loonbelasting i e depósito korespondiente na e kantidat di músiko ku ta bini for di eksterior.

Ku asombro riba djabièrnè, 17 di novèmber 2017, e representante di SUMUSICA ta keda notifiká di forma ‘verbal’ ku e pèrmit lo no wòrdu otorgá mas, esaki debí na e lei ku tin ku ta prohibí presentashon di artista internashonal durante dje periodo di 1 di desèmber pa djárason di shinishi. SUMUSICA ta lamentá e hecho aki, mirando ku fo’i 2015 ku a introdusí e lei aki, tur aña tabata duna dispensashon i presentashon di artistanan internashonal tabata tuma lugá. E ta lamentá mas aun e hecho ku a hasi petishon pa presentashon dje artista internashonal for di luna di òktober 2017 i te ku dia di awe, Departamento di Pèrmit di Polis, lesa Minister di Hustisia, no a entrega SUMUSICA un karta di forma ofisial pa bisa ku no ta otorgá e pèrmit.

Despues ku SUMUSICA a evaluá e situashon ku a presentá djabièrnè siman pasa, no a keda e organisashon nada otro di trata lo mas tantu posibel pa evitá mas gastu, tumando na konsiderashon ku a hasi pago na artista, kompra di pasashi, a paga promoshon lokal i sin konta tur preparashon ku tabata tumando lugá. SUMUSICA a tuma kontakto ku tur partner ku tabata enbolbí den realisashon dje proyekto pa informá ku a posponé e evento pa aprel 2018. Na e públiko i esnan ku a kumpra karchi, no keda defroudá. Ya fecha nobo pa ‘Taste of Music’ a keda konfirmá i esaki lo ta dia 7 di aprel 2018. E eskoho di e fecha nobo ta basa riba e hecho ku mester tene kuenta ku Temporada di Karnaval 2018 i Kuaresma.

Prebenta dje evento lo tuma lugá dia 3 di mart 2017, riba e dia aki por hasi kambio di karchi òf tuma sèn bek ku e persona no por asistí riba e fecha nobo dje evento. Un biaha mas SUMUSICA ta lamentá ku mester posponé e evento pero mirando e sirkunstansia bou di kua a keda informá dje desishon lo no por a kore e riesgo di sigui hasi preparashon i pa na último momentu, manera kustumber, Gobièrnu, Departamento di Pèrmit di Kuerpo Polisial duna bu e karta di rechaso 1 dia promé ku e evento tuma lugá.