UNOCA hunto cu nan instituto Scol di Arte ta organisando pa di dos aña un Summercamp di Arte, pa hobennan di Aruba. Un programa cu a ta asina atractivo cu e ta atrae hobennan for di tur area di Aruba. Jessy Simon, ta e persona encarga cu e campamento den su totalidad. Segun Sra. Simon a splica, UNOCA ta traha pa henter Aruba y den e programa di Summercamp por participa mucha y hobennan di tur bario. E aña aki nan a haya 92 hoben cu a inscribi y cu ta biba na diferente areanan di Aruba. Pa hacie mas facil, tur esnan di pabou di brug ta yega na sede di UNOCA mainta, unda nan ta subi e bus cu ta hiba nan Scol di Arte na San Nicolas.

Nos ta trata di atrae muchanan di diferente bario y districto pa nan por uni cu otro y na mesun momento pasa un rato alegre, Sra. Simon a splica. E campamento aki a wordo bishita door di Minister encarga cu Asuntonan di Cultura Sr. Otmar Oduber, kende tabata impresiona pa e talentonan cu tin bou di e hobennan aki y e forma cu nan ta expresa nan mes asina espontaneo den diferente area, manera canto, pintamento, actuacion, etc. E participacion a wordo habri pa muchanan for di 5 pa 11 aña, sinembargo consciente di e conocemento di cada edad, a parti e hobennan den categoria di edad pa nan keda den grupo di nan mesun nivel y no keda un diferencia grandi ora cu hinca grandi cu chikito hunto.

Summercamp di UNOCA ta basta amplio ya cu e participantenan ta wordo exponi na diferente tipo di arte pa mira cual ta mas di nan agrado. Asina por ehempel nan por scoge pa haci graffiti, baila hiphop, haci teatro pero tambe nan yuda cu nan conocemento general. Por ehempel tin presencia di Cruz Cora cu ta mustra con pa uza nan telefon ora di casonan di emergencia. Loke ta interesante ta cu e muchanan tambe por a siña con pa expresa nan mes den Yoga, un tipo di meditacion. Cada actividad ta wordo haci den un sala diferente pa laga e participante sinti cada bes un ambiente diferente ora cu a bay cera conoci cu un otro tipo di arte. Di loke cu Sra. Simon a experencia como guia te aworaki ta cu e muchanan, apesar cu na inicio nan tabata un poco timido, cu transcurso di dianan a yega na conoce otro participantenan miho y ta habri nan mes mas, expresa nan mes miho y cerca amistad nobo tambe.

“Nos ta purba motiva nan pa crea mas amistad cu otro participantenan.” Awendia mayornan ta proteha nan yiunan hopi, sinembargo Sra. Simon a expresa cu lo ta bon pa mayornan permiti nan yiunan experencia otro tipo di actividad, pafo di e area di proteccion di mayornan. “Ta bon pa habri nan circulo social mas, y nan siña conoce y anda cu mas hende. Nan ta habri y expresa nan mes mas,” e guia di e Summercamp di Scol di Arte a duna di conoce. Na final di e Summer Camp e mayornan ta haya chens pa mira tur loke e muchanan a siña y traha durante e summercamp den cual nan a participa.