Agentenan di region Latinoamerikano i Karibe a topa otro na Kòrsou

Willemstad, Kòrsou- mart 2015; Resientemente Subway Latin America & Caribbean (LAC) a tene nan konferensia anual aki na Kòrsou. Region Latinoamerikano i Karibe ta esun ku mihó prestashon den e kadena di restorantnan di Subway. Ademas di sobresalí, nan ta surpasá kompetidornan den region. Di akuerdo ku direktor regional, sr. Brian Marino e prestashon di restorantnan Subway den region ta algu ku meresé un aplouso, “Nos a habri 733 restorant den 2014 i asina alkansá 4,152 restorant den henter region. Ademas di esaki ku satisfakshon por menshoná ku tin otro 807 restorant den desaroyo, pendiente pa nan apertura. E éksito di Subway ta danki na e atenshon pa kada kliente i den esaki, ta yuda kada frankisia sirbi nan komunidat i nan pais di e mihó forma”. Subway Kòrsou tabata anfitrion di koleganan for di den region Latinoamérika i region karibense pa un enkuentro ku tur agente. Tur agente ku tabata presente durante di e konferensia a representá un merkado den LAC. Durante di e konferensia tur agente a partisipá na seshonnan edukativo, a kompartí ‘best practices’ i a revisá proseduranan operashonal. Tur esaki komo parti di e plan pa mantené e kalidat di Subway den 2015 tambe. “Nos ta hopi orguyoso di tur esfuerso i tur logro di kada miembro di ekipo den kada pais respektivamente. Nan a kontribuí na e prestashonnan remarkabel den nos region”, asina direktor regional, sr. Brian Marino a finalisá bisando.