Tur preparashon ta práktikamente kla pa e di 5 konsierto di alumnonan ku ta sigui lès di perkushon serka e konosido perkushonista Pernell Saturnino. E konsierto ta tuma lugá dia 18 di novèmber den e teater di World Trade Center ku partisipashon di un gran kantidat di nos futuro perkushonistanan.

Pernell Saturnino no ta un deskonosí den mundu musikal. Tantu lokal komo internashonal Saturnino ta un di e grandinan den músika di perkushon i a risibí un Grammy Award pa esaki den pasado. Saturnino despues di a establesé su mes bèk na Kòrsou a kuminsá duna lès di diferente instrumènt di perkushon i a yega na un kantidat respetá di alumnonan ku ta praktiká e instrumènt di drum.

Despues di a organisá e promé konsierto pa su alumnonan, Pernell Saturnino a disidí di lanta un fundashon pa di un forma mas formal duna kontenido na su vishon pa músika bira un instrumento kardinal den formashon di nos hubentut. Na 2015 e fundashon ku ta karga su nòmber a bira realidat. Metanan di Fundashon Pernell Saturnino (FPS) ta diverso i ta dirigí riba terenonan musikal, edukashonal i sosial. Pa medio di diferente aktividat, proyekto i trayekto FPS ke stimulá ekselensia bou di nos hóbennan i kontribuí na nan formashon i desaroyo sosial usando músika komo vehíkulo. FPS ke kontribuí tambe na halsa nivel di nos músikonan lokal.

E aña akí un bes mas FPS ta duna e oportunidat na un grupo grandi di alumno pa demostrá nan talento i haña eksperensia tokando dilanti un públiko grandi. E konsierto tin komo tema ‘Soundtrax’ i e hóben perkushonistanan lo bai toka hitnan di diferente pelíkula i tambe seri di televishon. E konsierto ta primintí di bira unu hopi bunita danki na e aporte di e siguiente patrosinadónan: Winthrop Curiel Fonds, ACU, MCB, Curoil, Curinde, CWM, Baker Tilly, Excellency i Prins Bernhard Cultuurfonds.

Pa mas informashon riba meta i trabounan di FPS, pa informashon riba siña toka un instrumènt di perkushon i pa kompra di karchi pa e konsierto por tuma kontakto ku FPS na 518-8730.