Willemstad – Djasabra, 22 di desèmber entre 4’or i 12’or, e di dos edishon di Street Culture Festival ‘Kaya Kaya’ ta start sali. E ta un festival ku ta uni partisipantenan na un sitio den kurason di Ser’í Otrobanda na un manera sorpressivo. For di Keizershof bai Van Lennepstraat, i despues via Venusstraat yega ‘mirador’ bou di brug kaminda bo tin bista fastástiko riba bahia di Santa Anna. Huntu ku e habitantenan di e bario nos a traha duru e simannan ku ta tras di lomba pa konstrui un bario pa keda eksistí. Nos meta ta pa laga e bario atras den un situashon mihó ku nos a bin hañ’e: ‘Leave it Better Behind’. Abo komo bishitante por konta riba un festival tur afó pa selebrá e desaroyo aki ku diferente kultura di kayanan di Kòrsou. Bo ta haña presentá obranan, live music, pop-up restorants i otro vendor stands ku por ehemple kos dushi i bibida.

‘Meta di e fèstival ta pa trese diferente hendenan huntu i pa duna un bario un impulso positivo. E trabounan ta tuma lugá den estrecho koperashon ku Fundashon Ser’í Otrobanda’ palabranan di Kurt Schoop. ‘Un toke positivo ta ku Kaya Kaya a haña diferente sponsors ku nos tin e posibilidad pa desaroyá e bario di un sistema mas duradero.’

E personanan ku a krea Kaya Kaya ta Kurt Schoop, Raygen Zuiverloon i Clayton Lasten. E promé Kaya Kaya a tuma lugá ougustus ku tabata un eksito rotundo. E eksito a animá e trio pa kuminsá prepará mes ora pa e di dos Kaya Kaya. Un limpiesa grandi mester a tuma lugá i planta mata pa un toke bèrdè. Entre otro Aviantia Damberg, Marvi Johanna i Franco Zapata ta sòru pa diferente tipo di obranan di man i pinturanan na muraya (Murals). E desaroyo aki nos ta bai selebrá 22 di desèmber ku e Street Culture festival, Kaya Kaya.

Schoop: ‘E idea tras die Street Culture festival ta ban gosa, baila, kome, bebe i ban topa. Ku e programa di e día ei, no tin duda ku tur hende lo gosa. Tin algu pa tur hende.’ Tin podia manera “Boi’ Palu”, “Plenchi”, “Heights” i “Plasa” loke ta e presentashonnan ku bo por skohe loke bo gusta. Bo por skucha jazz legends Ronchi, Betrian, Lonte, Saturnino, Rudy & Hershel. New Roots Rising Ft. Junior Tecla & Russel Soliana (Issoco), Ron Le Bass Ensemble Ft o.a. Andrew Christopher, Young & Upcoming Talent Stage by Silver Wolves, Kaylee de Haas, Happy Peanuts, K’Ribe, Hype i Aisha Lucas. Dies diferente DJ’s, p.e. DJ Beetz, Mr Cash, Jay Stax. Pit Smoker, Bali, Koki Riba Bloki i un Backyard Pop Up restorant di Furdy’s ta ofrese bo dushi kuminda i tur sorto di snacks. Habitantenan ta pone nan kas disponibel pa artistanan, manera UFO & Carlos Blaaker por husé komo galeria di arte. Habitantenan di Otrobanda tambe ta ofrese bo tur sorto di kos di pasa boka manera ayaka, keshi yená, sùlt, empaná, pasa palu box, vegan, grill i e sòpi di Kaya Kaya.

Zuiverloon: ‘Loke ta importante ta e echo ku e habitantenan di e bario ta 100% enbolbé. E Enbolbimento ei a duna komo resultado ku e promé edishon di Kaya Kaya a trese un kambio permanente. E community buidling ku nos tabatin den mente a logra. Nos ta eksperenshé den praktika.’ Despues di Kaya Kaya, regularmente tin fiesta, BBQ, i tambe hendenan i turista ku ke wak e bario. Nos ta bai mas leu. Tin diferente grupo ku a demonstrá interes den e bario despues di Kaya Kaya. A filma un videoclip Brasilero den e bario i un Kas di Moda internashonal a hasi un fotoshoot aki den e bario. ‘Asina nos ta mira spin-offs bunita i importante.’ Zuiverloon ta bisa.

‘Nos ke revelá e potenshal di Otrobanda Kaya pa Kaya i sigui desaroyé. Ku e festival nos meta ta pa duna e bario un boost, saka presiosidatnan i konekta hendenan ku otro. Kaminda e festival ta bai tuma lugá ta un parti di Otrobanda ku tin hopi kos i partinan presioso ku ta skondí. Pesei nos ta invita bosonan tur pa bin eksperensha e sorpresa di bo bida.’ palabranan di Lasten.

E festival ta gratis i ta pa chikitu i grandi. Lasten: ‘Un konseho: bisti sapatu komodo. Nos ta warda boso ku kurason habrí.’

f: www.facebook.com/Kayakayaparty/